Os cazadores ven insuficientes as medidas para previr danos do xabarín en cultivos

Unha enquisa da Unitega, realizada maioritariamente entre cazadores, amosa un consenso sobre a necesidade de executar accións antes de que se produzan os anos. Cuestiónase tamén que os vedados inclúan á caza maior

Os cazadores ven insuficientes as medidas para previr danos do xabarín en cultivos

Danos do xabarín nunha pradería.

As propostas realizadas pola Unión de Tecores de Galicia (Unitega) para mellorar a prevención de danos de xabarín sobre os cultivos semellan xerar un amplo consenso. Nunha enquisa de carácter non científico realizada pola propia Unitega, contestada maioritariamente por cazadores e/ou agricultores e gandeiros, sete de cada dez persoas consideraron que os actuais protocolos de prevención de danos non son axeitados.

Un dos problemas que detecta Unitega na xestión do xabarín é que as medidas só se aplican con posterioridade ó dano, cando os cazadores entenden que deberían tomarse medidas con anterioridade, en base a indicios de campo e ó coñecemento das poboacións do porco bravo e dos danos que vén producindo. Na enquisa, un 78% das persoas consultadas están de acordo con esa postura e consideran que deberían executarse medidas de prevención antes de que se produzan os danos.

Fóra do periodo de caza, entre as medidas de prevención máis eficaces, os consultados consideran que a realización dunha batida sen armas é o método máis axeitado. Tamén é ben valorada a acción de disuasión cun grupo de cans soltos, cun máximo de 6 cazadores e 12 cans. Outra medida, a acción de disuasión con cans atraillados, considérase sen embargo que pode ter unha eficacia media – baixa.

A segunda cuestión quente que destaca na enquisa é a dos vedados de caza, que se establecen durante un periodo de dous anos nun 10% da superficie de cada Tecor. Desde a óptica do control da poboación do xabarín, Unitega considera que os vedados deberían afectar só á caza menor, pero non á caza maior. Esa postura é refrendada de novo por oito de cada dez persoas que participaron na enquisa.

Máis información
Como denunciar os danos do xabarín?

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información