Galego
As imaxes de supermercados coas seccións de leite baleiradas foron unha constante dos últimos días, o que obrigou ás industrias lácteas a intensificar o envasado de lácteos. O sector está atendendo de xeito progresivo toda a demanda e espérase que nuns días a situación se normalice. Falamos con algunhas das principais industrias que operan en Galicia, como Lactalis – Puleva, Capsa (Larsa) ou a cooperativa Clun para coñecer o impacto que está a ter o coronavirus no seu traballo, así coma as medidas hixiénico – sanitarias que están adoptando.
O feito máis notorio dos últimos días é a elevada demanda de leite por parte dos consumidores. O director xeral de Clun, Rafael Prieto, explica a situación: “A demanda disparouse. Temos clientes que nos fixeron pedidos que eran 7 veces ou ata 15 veces superiores ós seus pedidos normais. A cuestión é que as vacas dan o leite que dan, pero estamos atendendo eses pedidos de xeito progresivo”, subliña Prieto.
Sección de leite dun supermercado baleira, esta fin de semana.
A estratexia de Clun centrouse en priorizar o envasado de leite para o mercado estatal sobre outros destinos. “Tiñamos previsto envíos para exportación que aprazamos. Tamén paralizamos vendas de leite a granel a unha industria que elabora produtos lácteos, pois pode reducir os volumes que procesa temporalmente, xa que está á marxe do actual pico de demanda. O noso obxectivo é envasar todo o leite posible e estivemos este fin de semana a tope de traballo, redistribuíndo a produción e atendendo a demanda de leite”, explica o director xeral de Clun.
A outra cara da crise é o peche da hostelaría e de establecementos colectivos, coma colexios. “Unha parte importante do noso negocio é o suministro de lácteos á hostelería e de iogures a colexios e outros centros, que é unha parte que se verá afectada seguro, pero tamén é certo que aumentou a demanda de envasado de marcas brancas de iogures por parte da distribución” -expón Rafael Prieto-. “En resumo, temos unha demanda máis que suficiente para darlle saída á nosa produción”, conclúe.
Desde Capsa confirman tamén que as súas factorías están traballando con normalidade, coa prioridade de atender o aumento de demanda rexistrado no mercado nacional. “Estamos comprometidos en garantir o suministro ó consumidor. As factorías funcionan con normalidade e da actual situación sairemos entre todos”, apuntan desde a firma asturiana, propietaria das dúas plantas de Larsa en Galicia.
En Lactalis – Puleva insisten na mesma idea: “Tanto as nosas fábricas como a recollida funcionan con normalidade e ó ritmo habitual. Temos unha importante responsabilidade coa sociedade: seguir ofrecéndolle ós cidadáns alimentos de primeira necesidade como o leite e o resto de produtos lácteos”, sinalan.
Medidas hixiénico – sanitarias nas factorías e na recollida de leite
O obxectivo das factorías de leite céntrase en garantir un funcionamento normal durante todo o periodo que dure a epidemia do coronavirus. Para elo, estableceron estrictos protocolos co obxectivo de minimizar posibles contaxios entre os traballadores. “Tan importante como garantir o abastecemento é garantir a seguridade dos nosos empregados”, destacan na Corporación Alimentaria Peñasanta (Capsa).
A firma asturiana está aplicando un protocolo que inclúe o peche das zonas comúns (comedores, cafeterías), a cancelación de visitas e reunións e o acceso escalonado do persoal ós vestuarios. Modificáronse ademais os turnos de entrada e saída da fábrica para que non coincida o persoal entrante co saínte e estableceuse un protocolo de limpeza das instalacións con produtos de maior poder desinfectante.
Son medidas similares ás que estableceron noutras industrias, coma Clun, onde fixaron protocolos para intensificar a limpeza nas zonas comúns (vestuarios, servizos), procederon á clausura de lugares comúns (máquinas de ‘vending’) e efectuaron tamén variacións nos turnos, a fin de proceder á limpeza e desinfección de vestuarios entre a saída dun turno e a entrada do seguinte.
Os transportistas teñen tamén uns protocolos claros. Non baixan do camión de recollida na factoría e nas granxas aplican unha solución desinfectante nas mans trala visita a cada gandería. A maiores, a cooperativa ten distribuídos entre os seus traballadores equipos de protección e mascarillas, se ben bota en falta non contar co número suficiente, un problema xeralizado a nivel de toda España.
En canto ó comité de dirección da cooperativa, reduciu ó mínimo as interaccións presenciais e están tendo as reunións por videoconferencias.
Lactalis
En Lactalis – Puleva, os protocolos van na mesma liña. “O obxectivo é garantir que as fábricas son lugares seguros. Podemos destacar que reforzamos a limpeza e desinfección diarias de tódalas áreas comúns e das superficies de contacto, o reforzo das medidas de control para entrada de visitantes, subcontratatas e transportistas ou a prohibición de viaxes nacionais ou internacionais. Tamén hai un protocolo para actuar no caso de colaboradores ou familiares de colaboradores afectados” -explican-. “En canto ós camións de recollida, creamos un protocolo co obxectivo de reforzar a seguridade tanto para eles como para os gandeiros ós que visitan a diario”.
