Corona de Andrade, 20 anos poñendo en valor a repostería tradicional

Améndoa, ovo, azucre e raspaduras de limón. Son os ingredientes que leva o roscón de Vilalba, un doce tradicional da Terra Chá que Tino Graña decidiu fabricar e comercializar en xaneiro do ano 2000. Hoxe a súa empresa, Dispravia SL, elabora 40 receitas distintas de doces e tartas que vende en toda Galicia, Madrid ou Cataluña.

“Comezamos coa metade da superficie que temos hoxe facendo unicamente roscón de Vilalba, pero cun produto só era imposible sobrevivir. O roscón é un doce moi local e con demanda limitada. Así que fomos ampliando e diversificando a medida que o demandaba o mercado e hoxe dispoñemos de 40 referencias”, explica o xerente de Corona de Andrade, a marca comercial que emprega Dispravia.

Os seus produtos (roscóns, roscas azucaradas, melindres, biscoitos, tartas de queixo ou de améndoa) encóntranse nas principais cadeas de distribución da nosa comunidade pero ademais de estar por toda Galicia tamén se venden en Madrid ou Cataluña. “O noso forte é Galicia, onde temos unha forte implantación a través dos supermercados Gadis e Eroski”, aclara Tino.

Millón e medio de euros de facturación

Dispravia pechou o ano 2019 cun millón e medio de euros de facturación, o que dá idea o volume de traballo desta empresa. “Son produtos asequibles, dun prezo de venda ao público reducido, polo que tes que mover moitas unidades de venda para facer unha cifra decente”, indica o xerente.

O ovo natural mércanllo a Avícola O’Viso e o pasteurizado a Granja Campomayor, mentres que o preparado lácteo para as súas tartas de queixo prodúceo a empresa Quescrem

Cando no ano 2000 Tino se lanzou á fabricación de repostería tradicional non tiña experiencia “nin de pasteleiro nin de panadeiro”, recoñece. Adicábase ao sector da distribución alimentaria, actividade que mantivo en paralelo ao da fabricación até fai catro anos, polo que coñecía o mercado da alimentación desde esta outra perspectiva, algo que lle axudou a abrir mercado a aquilo que ía fabricando no obrador situado no polígono industrial de Vilalba.

Ainda hoxe segue sendo el o que se encarga do traballo comercial e do contacto cos clientes, algo que recoñece que se lle dá ben. O 90% da produción comercialízana na actualidade a través de cadeas de distribución. “Venda ao detalle xa practicamente non facemos”, explica o xerente de Dispravia, que recoñece que “nestes 20 anos o mercado da alimentación cambiou moitísimo”. “A tenda tradicional está desaparecendo case por completo, queda algunha que outra de especialidade e algún pequeno supermercado rural ou de barrio, pero cada vez menos”, asegura.

Recuperar receitas tradicionais

Neste tempo os hábitos de consumo tamén cambiaron, o mesmo que os gustos do consumidor. “O noso non é bolería industrial, son produtos artesanais, e de feito normalmente os nosos produtos non están situados no supermercado no medio da bolería industrial, senón co pan”, describe Tino.

Corona de Andrade naceu coa idea de recuperar receitas tradiconais galegas e segue mantendo esa filosofía. “Queremos seguir conservando as receitas autóctonas, hai moita xente que volve valorar ese tipo de produtos”, asegura o responsable desta empresa chairega.

Para iso poñen un dos seus énfases no coidado da materia prima que utilizan. “O que podemos comprar en Galicia comprámolo aquí. O azucre ou a améndoa non poden ser galegos porque aquí non hai, pero o ovo ou os derivados lácteos si”, argumenta Tino. O ovo natural mércanllo a Avícola O’Viso e o pasteurizado a Granja Campomayor, de Palas de Rei, mentres que o preparado lácteo para as súas tartas de queixo prodúceo a empresa Quescrem, de Castro de Rei.

Dar confianza ao consumidor

A etiquetaxe de todos os produtos da marca Corona de Andrade inclúe toda a súa composición detallada porque “trátase de dar confianza ao consumidor”, afirma Tino, que dá moita importancia á seguridade alimentaria. “Deben facerse todos os esforzos en facer produtos seguros e saudables, produtos cada vez máis adecuados, por iso nós non usamos aceites de palma e estamos tendendo a reducir o nivel de azúcares”, di.

Todos os seus doces e tartas pasan por un detector de metais antes de seren envasados para evitar que calquera elemento estrano que poida vir na materia prima poida chegar ao consumidor

Todos os seus doces e tartas pasan por un detector de metais antes de seren envasados. “Ao principio parecíanos unha medida esaxerada cando nola empezou a pedir algunha cadea pero hoxe penso que non está de máis, que é bo extremar as medidas de seguridade, porque evitas sorpresas que moitas veces non dependen só de ti, porque pode vir algún elemento estrano no medio da materia prima, na fariña ou na améndoa, por exemplo e esta é unha maneira de detectala e evitar que ese produto chegue ao consumidor. Todo o que sexa traballar na seguridade alimentaria é positivo”, razoa.

Versatilidade para adaptarse ao mercado

Dispravia conta hoxe con 2.000 metros cadrados na zona de fabricación e outros 1.000 metros cadrados a maiores na zona destinada ás materias primas e embalaxes. “As materias primas entran todas por atrás e o produto finalizado, listo para saír ao mercado, sae pola parte de adiante”, explica Tino.

Aínda que naceu coa idea de fabricar roscón de Vilalba, a tarta de améndoa é hoxe un dos produtos principais de Corona de Andrade. “É a nosa bandeira durante todo o ano, levámola facendo tamén desde o ano 2000 e ten un consumo estabilizado durante os 12 meses con pequenas variacións”, indica. Así, nos meses de máis demanda, que coinciden cos do verán, Dispravia fabrica unhas 35.000 unidades cada mes de tarta de améndoa, cifra que se reduce a unhas 25.000 nos meses máis baixos, onde sen embargo se consumen máis outro tipo de elaboracións.

Unha empresa como a nosa ten que ser moi áxil e moi polivalente. Somos moi sensibles á hora de ir vendo o que o mercado demanda e as mensaxes que o consumidor vai lanzando

Adaptarse aos cambios nos gustos do consumidor e coidar ao cliente que distribúe e vende os seus produtos son algunhas das claves do éxito desta empresa vilalbesa. “Somos moi sensibles á hora de ir vendo o que o mercado demanda e as mensaxes que o consumidor vai lanzando e calquera suxerencia que uns ou outros nos poidan facer tratamos de atendela e de dar respostas satisfactorias sempre. Somos moi versátiles. Unha empresa como a nosa ten que ser moi áxil e moi polivalente. Tentamos fidelizar moito o cliente e conservamos moitos desde que comezamos a nosa andadura”, indica.