Galego
A mesa de cotizacións do porcino da Central Agropecuaria de Galicia – Abanca acordou hoxe novas baixadas dos prezos. Esta semana as reducións centráronse no porco cebado, mentres que os prezos para os leitóns continúan sen cambios. De novo, as negociacións dos prezos fixéronse de xeito telemático, posto que os mercados de gando continúan suspendidos por causa da pandemia do coronavirus.
No caso dos animais de categoría selecta e normal a baixada foi de 0,030 euros e pasan a cotizarse a 1,455 e 1,430 euros o quilo, respectivamente. Nos exemplares de Canle II o prezo sitúase en 1,857 euros o quilo, logo dunha caída de 0,039 euros. Os animais de desvelle cotízanse entre 0,81 e 0,87 euros o quilo, despois dunha baixada do prezo de 0,030 euros.
Nos leitóns mantéñense os prezos da pasada semana. Así, os animais procedentes dunha única granxa sitúanse nos 71 euros, mentres que os chegados de varias ganderías cotízanse a 66 euros. O prezo do quilo é de 3,55 euros e 3,3 euros, respectivamente.
O prezo do coello na Lonxa de Madrid sitúase a 1,85 euros o quilo.
