Galego
A xeada que caeu esta pasada noite en comarcas do interior de Galicia provocou importantes danos nos viñedos, truncando unha campaña vitícola que se iniciara moi ben, debido á práctica ausencia de enfermidades fúnxicas e ao avanzado desenvolvemento vexetativo.
Os gromos das vides foron queimados este baixón de temperaturas de ata menos seis graos, o que provocará un importante descenso da colleita tanto este ano como o próximo. A práctica ausencia de seguros agrarios fronte á xeada agrava a situación.
A comarca máis afectada foi Verín, onde segundo José Luis Mateo, viticultor e adegueiro de “Quinta da Muradella” “na zona do val ata o 90% dos viñedos quedaron arrasados e na zona de montaña arredor dun 70%”.
“Foi terrible e incluso afectou a viñedos de ladeiras ventiladas onde normalmente non afecta”, asegura. A situación agrávase porque as gromos xa estaban moi adiantados, con dúas ou máis cuartas de lonxitude, o que compromete a capacidade da vide para renovar, especialmente nas máis novas.
José Luis Mateo: “O problema é que colleu ás vides coa rama moi grande”
“Agora toca agardar a que esta noite non volva xear e avaliar os danos e recuperar a planta para o vindeiro ano, porque este case se dá por perdido. Como coidados haberá que repodar nalgúns casos, aplicar un produto cicatrizante para pechar as feridas e dar algún estimulante para recuperar as vides, que neste momento é o máis importante”, asegura José Luis Mateo.
Outra comarca vitícola que tamén se viu moi afectada foi O Ribeiro. Bernardo Estévez, un colleiteiro da Arnoia, informa de que “no Ribeiro hai zonas que están arrasadas, sobre todo nas zonas baixas”. “Na viña máis grande que teño o 50% das vides están arrasadas e nas que están en ladeira houbo menos problema”, recoñece.
“Que viñera unha xeada a estas alturas dentro do normal pero o problema é que colleuu ás vides coa rama moi alta”, asegura.
En Valdeorras a xeada tamén afectou, aínda que menos. Francisco García, presidente do Consello Regular da DO. Valdeorras explica que “a xeada afectou máis ás zonas de val e menos nas ladeiras. De momento os técnicos están facendo unha avaliación e a partir de aí facer unhas recomendacións”.
No val do Bibei, na DO Ribeira Sacra tamén a xeada provocou moita afectación. Fernando Álvarez, viticultor que cultiva unhas 12 hectáreas en Manzaneda, recoñece que “nos bancais hai moitísimo dano, eu diría que queimou o 50% das cepas, e ademais colleunas co ciclo moi adiantado”. “Esperemos que esta noite non volva xear porque sería catastrófico”, confesa.
Importantes danos na pataca de cedo
Patacas en Verín queimadas pola xeada
Outro cultivo que resultou moi danado foi a pataca de cedo. José Casales, un agricultor que sementa unhas 8 hectáreas no val de Monterrei asegura que “quedaron totalmente queimadas pola xeada, e o mesmo sucedeu nas patacas que estaban nadas na Limia”.
De momento a Xunta de Galicia non fixo unha valoración dos danos e se se vai establecer algunha liña de axudas como a que se estableceu o pasado ano para os viticultores da Ribeira Sacra afectados pola saraiba no mes de agosto.
Asaja demanda axudas e que se declaren algúns concellos zona catastrófica
Ante os danos producidos nos viñedos en todas as Denominacións de Orixe galegas pola forte xeada desta noite, ASAJA pídelle a Consellería do Medio Rural que “estudie a situación por se fose posible aprobar algún tipo de axuda para os viticultores afectados”. “Incluso, -engade- nos concellos que sufriron máis os efectos do frío, habería que analizar se sería necesaria unha declaración de zona catastrófica”.
Nos vindeiros días, a asociación asegura que “estará moi atenta a evolución dos acontecementos, por se fose necesaria a petición dalgún tipo de axuda institucional a nivel nacional.
Por outra banda, o vicepresidente de ASAJA, Francisco Bello, manifestou que “os agricultores profesionais que aínda non conten con ningún seguro agrario, deberían recapacitar moi seriamente sobre a necesidade de contratalo. Quen vive do agro non pode estar exposto aos danos que as inclemencias climatolóxicas poden ocasionar nas súas colleitas”.
