A sección ‘Noticias de empresa’ inclúe informacións de actualidade empresarial, así como as notas de prensa de firmas colaboradoras.

Os viños de Valdeorras conquistan Madrid

Os viños de Valdeorras conquistan Madrid

Francisco García, presidente da D.O. Valdeorras

Un total de 53 referencias de brancos e tintos de Valdeorras, pertencentes a 21 adegas, a metade das que conforman a D.O., puideron degustarse este luns en Madrid no acto de presentación da anada 2016 da comarca, no que participaron representantes dos ámbitos institucional, político, empresarial e social da capital de España, así como diversos distribuidores e restauradores de prestixio.

Ao comezo do acto, presentado polo actor Javier Veiga, o presidente do Consello Regulador da D.O. Valdeorras, Francisco García Álvarez, animou aos presentes a degustar os viños da comarca e a coñecer os “valores diferenciais e singulares” que os definen. García destacou a calidade dos viños da zona e expresou a súa seguridade de que, tras a degustación de hoxe, todos os asistentes ao acto actuarán “como prescriptores e embaixadores” dos viños valdeorreses.

Ademais, na súa intervención o presidente do Consello Regulador referiuse ao arraigamento e á tradición vinícola de Valdeorras. “Case todos os habitantes da comarca están ligados, dun modo ou outro, á elaboración de viño”, precisou, o que orixinou que na zona se fose conformando “un saber facer único” neste ámbito. Precisamente, “este saber facer permitiu á D.O. de Valdeorras situar os seus viños en mercados tan esixentes como os Estados Unidos, Reino Unido, Holanda, Bélxica ou Xapón”, destacou o presidente do Consello Regulador.

Ademais de Francisco García, interviñeron no acto a directora xeral de Gandería e Industrias Agroalimentarias da Xunta, Belén do Campo; o director da Casa de Galicia en Madrid, José Ramón Ónega; o subdirector xeral de Calidade Diferenciada e Agricultura Ecolóxica do MAPAMA, Javier Maté, e o prestixioso enólogo José Hidalgo, quen dirixiu unha cata comentada, explicando aos presentes as singularidades dos viños de Valdeorras.

O delegado da Xunta en Madrid e director da Casa de Galicia, José Ramón Ónega, valorou que “o viño é cultura, civilización e amizade. O viño forxa, en efecto, a amizade cando se escancia con prudencia”. Tamén tivo palabras de eloxio para a zona de Valdeorras, “un paraíso onde o Sil dá de beber á paisaxe e aos viñedos, onde os xistos e loureiras achegan fortaleza, por ser o teito de Galicia”. “Valdeorras é paraíso desde a Prehistoria e alí chegaron os pobos antigos e quedaron nesa fermosura de paisaxe. Andan as terras de León e Zamora preto e Valdeorras é a esencia de paisaxes e viñedos”, engadiu.

Cata comentada

Durante o acto, o prestixioso enólogo José Hidalgo destacou as singularidades e características das principais variedades autorizadas e preferentes de uvas brancas e tintas da comarca. Pola súa banda, a directora xeral de Gandería e Industrias Agroalimentarias, Belén do Campo, resaltou o “bo traballo” que están a efectuar as adegas que conforman a D.O. Valdeorras e puxo en valor a “relevancia” que posúen os actos de promoción para difundir a potencialiade dos viños galegos. Por este motivo, felicitou ao presidente do Consello Regulador por poñer en marcha de forma regular iniciativas divulgativas. Finalmente, definiu o sector vitivinícola galego como “estratéxico”

Finalmente, participou tamén no acto o subdirector xeral de Calidade Diferenciada e Agricultura Ecolóxica do MAPAMA, Javier Mate, encomiou o traballo da D.O. Valdeorras á hora de apostar por diferentes variedades de uva no seu territorio amparado. Mate destacou, ademais, que o ámbito vinícola mobiliza un volume de negocio en España de máis de 4.000 millóns de euros anuais.

Sobre a Denominación de Orixe Valdeorras

A de Valdeorras é unha das catro denominacións de orixe vinícolas da provincia de Ourense. Está conformada por 43 adegas dos municipios da Rúa, Larouco, O Barco, O Bolo, Petín, Rubiá e Vilamartín. Os viños desta D.O. ocupan un total de 1.171 hectáreas de territorio nas que traballan 1.460 viticultores. En 2016, a produción da colleita en Valdeorras superou os 4,6 millóns de quilos de uva.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información