Pouco leite colle no maletero dun turismo, pero no bloqueo de Leyma, en Arteixo, non deixan saír un coche sen revisar. Onte colóuselles un automóbil dun distribuidor que cargou o maletero de leite para bares e restaurantes e non queren que tal cousa lles volva suceder. “De aquí só pode saír o reparto para os hospitais”, asegura un retén dunha decena de gandeiros que monta guardia a primeira hora da mañá. “Acompañamos onte un camión para o Juan Canalejo con 700 quilos e hoxe irá outro para o hospital materno infantil”, explican.
A primeira hora do día, como cada mañá, os camións dos distribuidores pasan pola factoría, pero ó comprobar que o bloqueo continúa xa non fan intento de acceder ó recinto. Desde a noite do venres, non entran nin saen camións da factoría de Arteixo. Medio cento de tractores alíñanse no arcén ó redor da planta e os seus propietarios, produtores das comarcas de Ordes e Carballo, vanse turnando á porta para montar guardia.
Durante a noite do luns, foron unha vintena longa os que vixilaron a factoría, primeiro a pé de planta, e cando chegou o temporal, a partir da unha da madrugada, metidos nos coches e pasando a noite “a contos”. A primeira hora do martes, as obrigas do muxido deixaron reducido o grupo momentáneamente a unha decena escasa, que se foi reforzando co paso das horas cos gandeiros que collían o novo turno de vixilancia.
Negociacións polo prezo
A rutina do bloqueo está establecida e podería continuar así moitos máis días se fose preciso. Aos gandeiros non se lles ve con ánimos de levantar a protesta. Preguntados polos 2 céntimos de aumento que anuncian Eroski e Mercadona, os produtores ven esa mellora como insuficiente. “O tema é que hai moita diferenza de prezos. A un gandeiro que estea a cobrar a 29 céntimos, se lle pasas a 31 céntimos, pois igual lle pode servir; pero a un que estea cobrando a 20 céntimos, pásalo a 22 céntimos e queda igual que estaba”, valora un gandeiro de Trazo.
“A un produtor que estea cobrando a 20 céntimos, unha suba de 2 céntimos no leite non lle serve” (Gandeiros no bloqueo de Leyma)
“O que pedimos é que se regule un prezo sostible, que co noso traballo poidamos gañar para vivir”, secunda un compañeiro de Laracha. Completa o argumento un terceiro: “Se o propio Ministerio di que o custo de produción está en 34 céntimos, por menos diso non podemos pasar”.
No medio do debate plántase un camión cisterna na porta da fábrica. O conductor báixase e asegura que só leva auga osixenada para a depuración das augas da planta, pero os gandeiros non están pola labor de darlle paso así como así. “A idea é que toda a planta estea parada, non só o procesado de leite”, explícanlle. O afectado insiste, apela a súa familia, que non o ve desde hai 15 días, e ó final consegue unha revisión da ‘sentencia’: “Volve máis tarde, cando estea o responsable noso e miramos”.
O que si pode saír, escoltado por un turismo dos gandeiros, é o camión que vai entregar o leite ó hospital. En Lugo tamén se permitiu a saída de leite das factorías para hospitais e bancos de alimentos. “Que se vexa que para cousas de necesidade cumprimos”, piden os gandeiros en Arteixo. “Iso si, nos supermercados esperamos que se remate o leite máis cedo que tarde”.