Galego
Preto de 200 gandeiras manifestáronse este mediodía en Lugo en protestan polos baixos prezos do leite e a falta de solucións por parte da Administración. Convocadas por Agromuralla, as manifestantes percorreron a Muralla cunha pancarta co lema “Somos gandeiras….por pouco tempo”.
A marcha finalizou sobre as dúas da tarde ante a delegación da Xunta de Galicia, onde leron un manifesto tres mulleres: unha esposa, unha filla e unha nai de gandeiros.
Marga Ignacio Cancela, esposa de gandeiro da parroquia lucense de San Xoán do Campo, e unha das lectoras do manifesto, asegurou en declaracións a Campo Galego que “con esta acción queremos demostrar que non só protestan os homes, senón tamén as mulleres”. “Cando eles protestan somos nós as que levamos todo o traballo da casa e da explotación e por esta vez quixemos ser nós as que nos manifestásemos en público”, explica.
Marga Ignacio: “Por esta vez quixemos ser nós as que protestemos por prezos dignos para o sector lácteo”
Asegura que os motivos da protesta son idénticos:”demandamos un prezo digno para o leite e que a distribución traslade aos produtores a suba que lles aplicou aos consumidores”. Denuncia que “aos gandeiros están a pagarnos o leite igual que fai vinte anos, pero os custos de produción multiplicáronse”. E critica que “a Administración non atende as nosas demandas, cando está en xogo o futuro de máis da metade das explotacións de vacún de leite de Galicia”.
Dignidade tamén foi o que reclamou Alba, unha nena filla de gandeiros que pediu aos gobernantes que o sacrificio dos seus pais por levantar unha explotación láctea non sexa en balde e ela poida ter tamén un futuro digno continuando coa gandería familiar.
Os gandeiros de Agromuralla protestarán mañá ante o Lidl de Infanta Elena
Polo demais, as protestas dos gandeiros organizados en Agromuralla continuarán mañá. A partir das 16:00 horas concentraranse ante o Lidl da Avenida Infanta Elena para repartir información entre os clientes. Pola noite, a partir das 22:15 proxectarán un vídeo ante o edificio da Xunta de Galicia, na Rolda dá Muralla.
Lidl é unha das grandes cadeas da distribución, xunto con Carrefour, Alcampo e Eroski, que non asinou o acordo lácteo do pasado 23 de setembro e que, segundo os gandeiros, non traslada aos gandeiros a subida de prezos do leite que se aplica aos clientes.
