Galego
A multinacional alemá BASF presentou este xoves en Lugo Vizura®, un produto innovador que incrementa a capacidade fertilizante dos xurros e estercos e reduce o impacto ambiental que provocan as perdas de nitróxeno dos abonos orgánicos tanto a través do lavado (lixiviación), como da evaporación en forma de gases.
Estas perdas non só supoñen unha importante fonte de contaminación ambiental, en forma de nitratos que afectan á calidade das augas, e de óxido nitroso, un gas de efecto invernadoiro, senón que provocan importantes perdas económicas para o agricultor, ao desaproveitar ata máis do 50% do nitróxeno que conteñen os xurros.
Neste sentido, Vizura é un composto químico que inhibe temporalmente a acción das bacterias nitrosomonas, presentes no solo e que se encargan da transformación de nitróxeno amoniacal dos xurros en nitratos e óxido nitroso. Desta forma permítese que a planta aproveite durante máis tempo o nitróxeno amoniacal e redúcense substancialmente as perdas.
En concreto, o nitróxeno amoniacal con temperaturas do solo de 5 graos pasa de estar dispoñible durante 6 semanas a entre 10 e 14 semanas, e cando a temperatura do solo sobe ata 20 graos, este período amplíase de 1 semana, a entre 4 e 6 semanas se se emprega Vizura, segundo os estudos realizados por Basf.
Resultados dos ensaios no Ciam
O produto, que este ano se empeza a comercializar en España, foi testado por Basf en distintos centros de investigación da Península, entre eles o Centro de Investigacións Agrarias de Mabegondo (Ciam), que o pasado ano realizou ensaios en cultivo de millo forraxeiro e este ano prevé amplialos á rotación de millo forraxeiro con raigrás.
En concreto, a investigación levada a cabo no Ciam comparou os resultados de sete tratamentos de fertilización nos seus correspondentes campos de ensaio de millo: fertilización mineral ao 70% e ao 100%, fertilización cun 70 e cun 100% de xurro de vacún, fertilización con estas dúas proporcións de abono orgánico pero engadindo Vizura® e unha parcela na que non se realizou ningún tipo de abonado.
Os resultados que expuxo a investigadora do Ciam, María Isabel García Pomar, mostran que “a incorporación de Vizura ao xurro de vacún supuxo producións semellantes á aplicación de fertilizantes minerais e un lixeiro incremento do 6% dos rendementos da colleita de millo respecto ao xurro de vacún”.
Ademais, destacou “o incremento na eficiencia de utilización do nitróxeno polo cultivo respecto ao xurro de vacún (…) e a diminución do surplus de nitróxeno no chan, respecto dos tratamentos minerais”.
Estes son os resultados presentados do ensaio realizado polo Ciam:
En todo caso, María Isabel García Pomar incidiu na necesidade de estender os ensaios durante máis anos para confirmar estes resultados.
Redúcense as perdas de nitróxeno en forma de nitratos e emisións contaminantes
Pola súa parte, Jorge Sanz Gómez, responsable de Desenvolvemento para Europa de Functional Crop Care Basf, e Arturo Sanz Simón, responsable de tecnoloxías de uso eficiente de Nitróxeno en Basf, expuxeron os resultados dos ensaios realizados con Vizura en distintos centros de investigación de España e Portugal.
“As emisións de óxido nitroso cando se utilizan xurros como abono orgánico pasan de 5 ou 6 quilogramos por hectárea a 2 quilogramos se se utiliza Vizura, e no caso dos nitratos, as perdas por lixiviación redúcense entre un 30 e ata un 65%”, destacou Arturo Sanz.
En canto ao impacto económico para o gandeiro, os técnicos de Basf destacaron que “Vizura permite reducir o abono de Nitróxeno de síntese no cultivo de millo forraxeiro e incrementa a colleita de millo entre un 6 e un 7%”.
Dose de aplicación
Vizura preséntase en forma líquida en envases de 10 e de 1000 litros, aínda que está en fase de comercialización un envase de 50 litros.
A dose é de entre 2 e 3 litros por hectárea, independentemente do volume de xurro, e pódese aplicar directamente na fosa -onde pode permanecer estable ata 3 semanas- ou na cuba antes de aplicar o xurro.
Cando o xurro inxéctase en profundidade -a opción máis recomendable para reducir as perdas de nitróxeno- a dose recomendada é de 2 litros, pero cando se aplica o xurro entre 0 e 10 centímetros -cun posterior enterrado superficial- a dose aconsellada é de 3 litros.
