O ciclo de prezos do leite está a cambiar, polo que as explotacións lácteas poderán recuperar nos próximos meses alomenos unha parte das perdas do último ano e medio. Esa é a conclusión que se desprende da análise que fai o director xeral de Feiraco, José Luis Antuña, sobre as perspectivas do sector.
“Non só tocamos fondo nos prezos do leite senón que xa estamos recuperando. Hai un cambio de ciclo” -valora Antuña-. “A oferta de leite a nivel mundial está reducíndose, en tanto a demanda é sostida. A mellora de prezos non vai chegar de xeito inmediato ó campo porque hai que ter en conta que temos uns stocks de leite en po acumulados que teñen que ir saíndo. Tardaremos un pouco en percibir a suba, pero está aí, os prezos das cisternas spot están medrando en Europa e os prezos da materia graxa tamén están en ascenso”, sinala.
“Tardaremos un pouco en percibir a suba de prezos pero xa está aí. O ciclo cambiou”
O director xeral de Feiraco incide en que é habitual que haxa un desaxuste entre a evolución dos prezos dos produtos lácteos industriais e a evolución do prezo no campo. “Levan unha evolución paralela pero en Galicia imos cuns meses de retraso. Cando os prezos dos produtos industriais están no máis alto, o gandeiro tarda uns meses en acadar o pico de prezos, e viceversa, cando os prezos tocan fondo a nivel mundial, as granxas están nun nivel de prezos máis elevado que non se corresponde con esa situación”.
Perspectivas
Para o curto prazo, no 2017, as perspectivas son positivas: “Na miña opinión, o 2017 debe ser un bo ano de marxes para os produtores lácteos de Galicia. Os prezos do leite mellorarán, en tanto os prezos de materias primas como a soia ou millo teñen expectativas de estabilidade. Iso permitirá recuperar parte da crise que levamos os últimos 18 meses”, conclúe o director xeral de Feiraco.
“Eu fágome unha pregunta. Seguramente non merecemos que os prezos do leite baixasen tanto, pero facemos algo para cambialo?”
Antuña segue a considerar que as perspectivas de futuro, a pesar da última crise, son boas. “De aquí ó 2025, a demanda de leite a nivel mundial medrará un 25%. A población mundial está en aumento e nos países emerxentes a renda e o consumo de leite están a medrar”, valora, se ben subliña a necesidade de fixarse máis nas marxes que deixa o leite que no prezo. “Hai que falar de marxes e ser o máis eficientes posibles no control dos custos de produción”.
Estabilidade
Lograr unha maior estabilidade nos prezos do leite, reducindo os picos polo alto e polo baixo, é outro dos obxectivos que Antuña sinala como asignatura pendente para o sector lácteo de Galicia. “Eu fágome unha pregunta. Seguramente non nos merecemos que o prezo baixase, pero facemos algo para cambialo? Se non cambiamos de modelo, estaremos condicionados sempre pola volatilidade de prezos que nos impoñan os demais”.
Desde a perspectiva de Antuña, o proxecto de integración cooperativa no que traballan Feiraco, Os Irmandiños, Melisanto e Xallas ten que contribuír precisamente a ofrecerlle unha maior estabilidade ás granxas socias.