Leve repunte do leite en España, con Galicia no vagón de cola

Leve repunte do leite en España, con Galicia no vagón de cola

O último informe de prezos e entregas de leite, correspondente ó mes de agosto, amosa un leve repunte de 0,3 céntimos no prezo do leite a nivel español, sitúandose a media de valores pagados no campo en 32,3 céntimos. En Galicia, o repunte foi de 0,1 céntimos, situándose o prezo medio en 31 céntimos. Como é tradicional, é a comunidade co prezo máis baixo, nesta ocasión xunto con Cantabria. Na parte alta de cotizacións, destaca o caso de Asturias, con 34,4 céntimos.

O mes de agosto foi o primeiro do ano en que os prezos remontaron lixeiramente, logo de acusar unha tendencia á baixa desde xaneiro a xullo. O leite arrancou o ano en 33 céntimos a nivel estatal e tocou fondo en xullo, con 32 céntimos. A nivel galego, comezouse o 2019 con 31,7 e en xullo estaba en 30,9 céntimos.

Os datos do Fondo Español de Garantía Agraria (Fega) apuntan tamén a continuación da tendencia de aumento de entregas de leite a nivel español. En agosto deste ano produciuse un 2,5% máis que en agosto do ano pasado e no global do ano, o aumento de entregas acumuladas é do 0,6%.

Outro dato habitual no informe é a evolución do número de explotacións, que seguen na tendencia á baixa. Quedan 13.075 en toda España, unhas 800 menos que hai un ano. De todas elas, algo máis da metade, 7.280 están en Galicia, unhas 400 menos que hai un ano.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información