Recomendacións para o cultivo da horta no mes de abril

Recomendacións para o cultivo da horta no mes de abril

Abril é un mes de moita actividade na horta pois marca o inicio para plantar a maioría dos cultivos de verán (xudías, tomates, leitugas, patacas de tarde, cabazas..). Aínda que a posibilidade de xeadas adoita ser moi escasa, si que poden darse importantes oscilacións térmicas e algunha saraibada polo que haberá cultivos que, se os plantamos en exterior, teremos que protexer.

Os devanceiros, sabedores da importancia deste mes para a colleita de todo o ano, deixaron ditos como “Abril que non chove, deixa ao labrego pobre”. O mes de marzo trouxo moi poucas precipitacións polo que se agarda con ansia a auga neste mes de abril.

Velaquí algúns consellos:

– Sacharemos as plantas sementadas o mes pasado, como chícharos, leitugas, cebolas ou brásicas (repolo, brócoli, coles…). Sempre debemos facelo con tempo soleado e seco para axudar a que sequen as herbas.

-Tamén nos lembraremos de sachar e quitar as herbas adventicias en cultivos que xa plantamos hai meses, como os allos, os chícaros ou os amorodos. En caso de que haxa varios días seguidos de calor e humidade, favorecerán a aparición de mildeu ou rolla en allos e cebolas, polo que é recomendable facerlles un tratamento antifúnxico sulfatando as cebolas con cobre e, no caso dos allos, engadirémoslle un pouco de xofre.

– No caso das patacas de cedo, se xa están nadas e en caso de que coincidan varios días seguidos de calor e humidade tamén é recomendable facerlles un tratamento con sulfato de cobre para previr a aparición de enfermidades.

– Quitaremos da terra os últimos cultivos de inverno, especialmente os porros, que durante este mes tenderán a grelar. Picalos e conxelalos é unha opción fácil para dispor deles durante os próximos meses.

– Neste mes, tamén podemos empezar a plantar as patacas de tarde, agás nos 33 concellos do norte das provincias de Lugo e da Coruña, así como no coruñés de Muxía, nos que está prohibido plantalas debido á praga da avelaíña guatemalteca. Para os que sigan o calendario lunar, preferentemente en lúa minguante.

– En canto ás sementeiras, podemos plantar en exterior leituga, porro, acelgas, remolacha…etc. Para pequenas hortas familiares, unha opción máis cómoda é mercar directamente a planta en cepellón.

– Dende finais de abril e até principios de maio é o momento tamén de plantar en exterior todo tipo de cucurbitáceas. É dicir, cabaciña, cogombro, cabaza, melón, sandía..etc.

– Tamén podemos plantar en exterior cara fin de mes xudía, tanto baixa como de enrame, que  podemos colleitar a finais de xuño.

– É un bo momento tamén para plantar cenouras, preferentemente en lúa minguante. Actualmente xa hai no mercado semente que ven pegada a tiras de papel, o que facilita moito a sementeira.

Loxicamente, as condicións climáticas de Galicia varían moito dunha comarca a outra, polo que estes consellos haberá que adaptalos, atrasando as épocas de transplante en exterior se o clima é máis frío e estamos a maior altura.

Por último, non debemos esquecer seguir removendo o noso composteiro ou pila na que imos xerando o noso propio abono orgánico cos restos dos alimentos, herba, follas….etc.

image_print

2 ideas sobre “Recomendacións para o cultivo da horta no mes de abril

  1. Vanesa

    Que vos parece de sulfarar un horto que está cheo de ortigas? No caso de sulfatar con glifosato terá moitos riscos paraa saúde?
    Grazas

    Contestar
    • campogalego

      Non o faría. Se é pequena a horta cortaría as ortigas e logo incorporarías á horta como abono. As ortigas indican un exceso de nitróxeno no solo, polo que durante un ano non abonaría. Espero que che sirva de axuda.

      Contestar

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información