Así se expandiu a avespiña do castiñeiro en Galicia en catro anos

A praga detectouse no 2014 en dous focos principais, en Lugo e Ourense, sumando ese primeiro ano 44 positivos. Este exercicio pechouse con 4.130 novos positivos e a praga xa entrou na gran zona produtora do oriente de Ourense

Publicidade
Así se expandiu a avespiña do castiñeiro en Galicia en catro anos

Mapas que reflicten a expansión da avespiña do castiñeiro. No da esquerda, os positivos confirmados. No da dereita, concellos con presenza da praga: en cor clara os casos do 2017 e na cor máis escura os do 2014; en branco os concellos sen a praga.

A avespiña do castiñeiro colonizou case por completo Galicia en a penas catro anos. Só quedan libres zonas puntuais da Mariña lucense, do Barbanza e do Rosal, pero é previsible que aguanten pouco tempo sen a praga. A expansión da avespiña foi meteórica. Dos 44 positivos confirmados no 2014 en Lugo e Ourense, pasouse ós 4.130 novos positivos do 2017, ano no que a praga entrou na gran zona produtora de castaña, no oriente de Ourense.

As montañas orientais de Lugo, outra zona tradicional de castaña, xa sufriran a incursión da praga no 2016, polo que é previsible que en próximos anos o impacto da avespiña se deixe notar na colleita tanto no oriente de Lugo como en Ourense. Cada avespiña pon cada campaña arredor de 100-200 ovos nos castiñeiros, polo que en a penas 2-3 anos o crecemento da súa poboación pode acadar cotas preocupantes.

Os datos da Xunta apuntan a que a avespiña está presente no 91% dos concellos de Ourense (84), no 84% dos concellos de Lugo (56), no 71% dos concellos da Coruña (66) e no 70% dos concellos de Pontevedra (43), segundo os datos que expuxo José Carlos Costas, da Consellería do Medio Rural, nunhas recentes xornadas sobre o castiñeiro organizadas polo Centro de Investigación Forestal de Lourizán.

Mapa das zonas de solta de 'Torymus sinensis' no 2017.

Mapa das zonas de solta de ‘Torymus sinensis’ no 2017.

Loita biolóxica
Galicia acumula ata o de agora arredor de 8.000 positivos detectados (44 no 2014, máis de 1.700 no 2015, máis de 2.200 no 2016 e máis de 4.100 no 2017). Para enfrontar o problema no curto prazo, a única solución pasa pola solta dun insecto, o ‘Torymus sinensis’, que parasita as postas de ovos da avespiña. O Ministerio autorizou ata agora as soltas a contagotas, dun xeito experimental. No 2015 só puideron liberarse 1.500 individuos, no 2016 xa foron 66.000 -exclusivamente en Lugo e Ourense-, e este ano 133.000, con extensión das soltas a Pontevedra e a Coruña.

Para o 2018, a previsión da Xunta é ampliar as soltas a 1,6 millóns de ‘Torymus sinensis’, sempre e cando consiga a autorización ministerial e Italia, o país suministrador, logre aportar esa cantidade de parasitoides.

Outra das dúbidas que planea sobre o sector é a calidade dos parásitos enviados desde Italia, pois no país transalpino recoléctanse os insectos do campo e dubídase de que as partidas que se mercan estean compostas unicamente por ‘Torymus sinensis’, segundo manifestou unha das ponentes nas xornadas do castiñeiro celebradas en Santiago.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información