Ventonoso, preocupado pola “indefensión” dos propietarios ante 18 novos parques éolicos

O colectivo considera que se está primando o interese das empresas e ve “pobre” a execución en Galicia de 400 novos megawatios de enerxías renovables, tras as expectativas levantadas nas poxas enerxéticas do Goberno central

Ventonoso, preocupado pola “indefensión” dos propietarios ante 18 novos parques éolicos

En Galicia haberá 18 novos parques eólicos en funcionamento o 31 de decembro do 2019. Son instalacións todas elas que se benefician das poxas de enerxías renovables do Goberno central e que teñen ese prazo marcado para a súa execución. De non estar en marcha nesa data, perderán a fianza depositada e o prezo mínimo que teñen garantido para a venda da súa enerxía. Ventonoso, un colectivo que asesora ós propietarios rurais nas negociacións coas empresas eólicas, amosa a súa preocupación pola celeridade do proceso de implantación dos parques.

Para axilizar os trámites dos novos parques eólicos, que suman 409 megawatios, a Xunta declarou onte os proxectos “de interese especial”, unha figura recollida na Lei de Implantación de Iniciativas Empresariais que, entre outras cuestións, permite reducir á metade os prazos da tramitación administrativa. Con esa decisión, reduciranse os prazos de alegacións e facilitarase a expropiación de terreos.

“O proceso de tramitación dos parques beneficia claramente ás empresas, pero haberá que ver en que perxudica ós galegos” (José Antonio Diéguez)

O proceso preocupa a Ventonoso. “Estamos ante unha tramitación que prima os intereses empresariais, pero haberá que ver en que perxudica ós galegos” -cuestiona o responsable de Ventonoso, José Antonio Diéguez.- “As negociacións que están en marcha para implantar estos parques son claramente á baixa e atopámonos con situacións de indefensión dos propietarios. Por exemplo, os propietarios poden asinar un contrato para a implantación de muiños dunha determinada potencia, poñamos 2 megawatios, e que logo a empresa instale muiños de 3-4 megawatios, sen que o propietario poida reclamar”.

Reactivación eólica
Os novos parques eólicos, promovidos por firmas como Gas Natural Fenosa, EnerGreen Power, Capital Energy, EDP, Greenalia ou Norvento, suman un total de 409 megawatios e ubicaranse principalmente nas provincias de Lugo e Coruña. Son os primeiros parques que se construirán en Galicia nos últimos oito anos, pero esa reactivación do sector é considerada pobre por Ventonoso.

“Logo das poxas enerxéticas do Goberno central, había adxudicados 2.320 megawatios a empresas que operan en Galicia, polo que esperábanse máis proxectos para a comunidade, pero só un 18% deses megawatios instalarase finalmente aquí”, sinala José Antonio Diéguez.

A Xunta anunciou onte que esperaba a posta en marcha de novos proxectos, ata sumar un máximo de 600 megawatios, moi por baixo en todo caso das expectativas apuntadas por Ventonoso. O presidente da Xunta, Alberto Núñez Feijoo, incidiu tamén en que os novos parques eólicos non contarán con primas para a súa posta en marcha, se ben Ventonoso considera esa aseveración unha falsedade. “Son parques que teñen un prezo mínimo garantido pola Administración, con fondos públicos, para a venda da súa enerxía”, explica José Antonio Diéguez.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información