“Desenvolver actividades que permitan unha diversificación da base económica dos espazos rurais, partindo do potencial de recursos existentes pero apostando pola diversificación e a innovación baixo unha estratexia de marca país”. Esta é a proposta xeral do estudo Novas demandas para o rural galego presentado este martes polo Foro Económico de Galicia no Centro Social Abanca de Santiago.
O documento elaborado polos economistas e profesores José Manuel Andrade, director da Fundación Juana de Vega, e María Xosé Vázquez, membro do Grupo de Investigación Economía dos Recursos Naturais e Ambientais da Universidade de Vigo, analiza a situación actual do medio rural desde unha perspectiva global.
O estudo, explican desde o Foro Económico, céntrase nas temáticas da paisaxe, a biodiversidade, as actividades agroforestais, os servizos, as novas actividades e a loita contra o cambio climático para examinar “unha estrutura económica en plena transformación”. Os autores do informe afirman que “para manter un rural vivo que cumpra coa súa función tradicional e que ademais dea resposta aos novos usos e novas demandas sociais, é necesario manter a súa multifuncionalidade, mediante unha planificación pública axeitada e programas e medidas específicas”, xa que, sinalan, todo o relacionado coa calidade ambiental e a conservación do medio “son funcións non remuneradas e non comercializadas que porén son fundamentais para a xeración de valor no rural”.
Os autores do documento examinan nel as limitacións e as oportunidades das distintas áreas de actividade no rural galego para elaborar unha serie de propostas de actuación. Segundo explican, a economía agraria precisa “dunha decidida intervención da administración pública que permita a adaptación aos novos usos e unha diversificación empresarial axeitada ás demandas actuais do mercado en todos os campos: desde os usos turísticos ao aproveitamento enerxético”.
Propostas concretas
Algunhas das principais medidas propostas son a creación dun “portal único para o emprendemento agroalimentario”, capaz de asesorar e xestionar os principais trámites burocráticos dos emprendedores. Tamén propoñen “a conservación da paisaxe e o patrimonio natural e cultural implícitos, mellorando a planificación de base para a ordenación territorial” e “a conservación da biodiversidade, equilibrando os tipos intensivos e especializados de produción agrogandeira co apoio ao desenvolvemento de produtos diferenciados e de calidade, seguindo o exemplo das denominacións de orixe vinícolas”.
Horta ecolóxica, pequenos froitos ou plantas medicinais son algunhas das oportunidades de negocio
Entre as medidas incluídas están o fomento do emprendemento “para impulsar unha maior capacidade de transformación industrial e de xeración de valor engadido nas actividades do rural” e, paralelamente, “fortalecer a industria agroalimentaria para ocupar nichos de mercado como a produción ecolóxica en produtos hortícolas, pequenos froitos, plantas ornamentais, medicinais ou aromáticas, así como na produción animal e forestal”.
O desenvolvemento turístico, a partir da confluencia entre as actividades dos servizos privados e a xestión e o investimento públicos que poidan favorecer a súa competitividade na busca dun produto turístico desestacionalizado e de calidade é outra das ideas incluídas no informe.
Os economistas tamén destacan a importancia da mellora dos servizos para os habitantes do rural (desde o transporte ás telecomunicacións), prestando atención ao asentamento de poboación non agrícola “que ten un papel crucial na diversificación das actividades económicas”. Por último, salientan a necesidade de mellorar a absorción de CO2, tendo en conta que a prevención do lume, a aposta pola función ambiental e social do monte galego e o impulso de actividades de economía circular ou bioeconomía son “as tarefas máis urxentes”.
Descarga aquí o informe completo.