A empresa de Vila de Cruces (Pontevedra), Galo Celta, comercializará este Nadal no Club Gourmet de El Corte Inglés a “Pularda Celta”, un produto exclusivo e de edición limitada obtido a partir da raza autóctona galega Galiña de Mos.
O fundador de Galo Celta, David Sueiro, destaca que “isto supón un paso moi importante para dar a coñecer en toda España un ave criada como antes, en réxime de semiliberdade e con alimentación tradicional na nosa explotación de Merza”.
Serán un total de 410 unidades de “Pularda Celta”, numeradas e de edición limitada as que se comercializarán en exclusiva durante estas datas no Club Gourmet de El Corte Inglés. A Pularda é a galiña nova xusto antes de que empece a poñer ovos e a súa carne é moi apreciada na alta cociña pola súa textura tenra e xugosa.
“Sacrificámolas no matadoiro de Ribadumia cunha idade de cinco meses e medio e un peso duns dous quilos, respectando unha crianza artesanal das galiñas de Mos, como se facía nas casas de labranza de Galicia tradicionalmente”, explica David Sueiro.
Así, a alimentación da Pularda Celta baséase en cereais e verzas que deben ser producidas na propia explotación. Tamén engaden á súa ración fariña de castaña, para engrasar de forma natural, e mesmo están a probar a alimentala con uva Garnacha, para darlle aminoácidos e azucres.
“Así conseguimos unha carne con sabores e texturas especiais, pura manteiga, unha vez que a Pularda Celta trabállase coas técnicas da alta cociña”, destaca David Sueiro.
Ademais, de nos centros El Corte Inglés de toda España, a empresa de Vila de Cruces ten previsto comercializar este Nadal 400 Pulardas Celtas en alta restauración de estrelas Michelín.
Caldo de Galiña Vella
Xunto á pularda, Galo Celta tamén empezou a comercializar na Sección Gourmet de El Corte Inglés “Caldo de Galiña Vella”, elaborado a partir de Galiñas de Mos da propia explotación de 2,5 anos de idade. “Queremos recuperar o caldo de galiña vella que as comadroas ofrecían ás parturentas no medio rural, un caldo enerxético e milagroso polos seus efectos recuperadores”, explica David Sueiro.
O caldo de Galiña Celta comercialízase en envases de medio litro e foi elaborado baixo a receita artesanal galega recuperada polo chef Iván Domíguez.