A Consellería do Medio Rural vén de presentar unha petición ao Ministerio de Agricultura y Pesca, Alimentación y Medio Ambiente relativa ao Real Decreto que regula a aplicación da Política Agrícola Común en España. A través desta iniciativa solicítalle o traslado dunha consulta á Comisión Europea para modificar o período de verificación dos cultivos da PAC -actualmente a Xunta realízaas de maio a xullo-, co fin de favorecer as explotacións gandeiras que teñen o millo como forraxe principal.
A conselleira do Medio Rural, Ángeles Vázquez fixo este anuncio na clausura das Xornadas Técnicas do Sector Lácteo que se celebraron este sábado en Mazaricos con motivo da Semana Gandeira.
O obxectivo é que en Galicia as inspeccións se realicen antes do mes de maio, para que durante o verán os terreos poidan dedicarse por completo á plantación de millo sen ter que reservar unha porcentaxe á plantación de herba ou outros cultivos alternativos. Deste xeito, a Xunta de Galicia pretende que se deixe de penalizar as granxas de máis de 10 hectáreas que utilizan esta planta como parte fundamental da dieta forraxeira e que na actualidade teñen que reservar o 25% do terreo para outro tipo de plantación. Isto estalles a supoñer un aumento da dependencia de insumos externos e, polo tanto, un incremento nos custes de produción.
Cos controis actuais, entre maio e xullo, as ganderías galegas perden de media 180 euros por hectárea
De feito, un estudo do Ciam concluíu que a limitación do cultivo de millo forraxeiro afecta ás explotacións lácteas máis dimensionadas e suponlles un prexuízo de 180 euros por hectárea. A aplicación deste período de inspección de maio a xullo en 2015 e 2016 fixo descender a superficie de millo forraxeiro en Galicia máis dun 10% ata situarse este ano en arredor de 60.000 hectáreas.
Pola contra, o Goberno do Principado de Asturias optou este ano por elixir un período de control da diversificación de cultivos para o pago verde da PAC do 1 de xaneiro ao 15 de maio, co que facilitou que as súas ganderías de vacún de leite sementasen ata o 100% da súa superficie cultivable con millo forraxeiro.
A Conselleira demanda ao Ministerio que aplique o Decreto de cesión de prezos
Por outra parte, e no ámbito da regulación normativa, Ángeles Vázquez demandou ao Goberno Central que comece a aplicar o Decreto de Cesión de Prezos, así como que se avance no Decreto de Primeiros Compradores e elabore unha normativa de etiquetaxe obrigatoria da orixe do leite.
En canto á lexislación propia da Xunta de Galicia, a conselleira avanzou una incremento da partida orzamentaria para a convocatoria de axudas para a transformación de produtos agroalimentarios que sairá no mes de xaneiro.
Por último, Ángeles Vázquez lembrou a necesidade de que as ganderías de vacún de leite aumenten a súa base territorial para producir máis e mellores forraxes e reducir deste xeito os seus custos de produción. Neste sentido, asegurou que “a estratexia é deixar de lado as grandes concentracións parcelarias, e ir cara os Plan Marcos, paro que sería suficiente que varios veciños dunha aldea se puxeran de acordo, ben sexa mediante o aluguer ou mediante cambios na propiedade”.