Importantes perdas polas treboadas nos viñedos de Monterrei e Valdeorras

Unións Agrarias calcula danos en máis de 300 hectáreas das dúas denominacións de orixe, así coma en producións de horta. A organización agraria demanda axudas áxiles para os afectados

Publicidade
Importantes perdas polas treboadas nos viñedos de Monterrei e Valdeorras

Danos causados pola treboada nun viñedo de Monterrei. / Imaxe: Unións Agrarias.

As treboadas torrenciais que caeron en parte da provincia de Ourense causaron serias perdas no concello de Monterrei, afectando ós viñedos da denominación de orixe do mesmo nome, e tamén provocaron importantes danos en Valdeorras, en especial nas viñas da zona do Bolo. Esa é a conclusión da primeira análise que fai Unións Agrarias tralas chuvias e saraibadas caídas onte. A organización agraria calcula que hai máis de 300 hectáreas de viñedos afectados.

Unións informa en nota de prensa de que os seus técnicos están a recoller datos do nivel de afectación, pero confirma que se están a detectar casos de extrema gravidade, con produtores que van perder toda a colleita. O responsable de viña da organización, José Ramón González, destaca que é prioritario un cálculo áxil e eficiente dos danos, de cara a reclamar da Xunta a habilitación de partidas para compensar ós afectados.

“Imos solicitar un catálogo de medidas para aliviar as perdas, tanto axudas directas como a diminución da carga tributaria dos agricultores afectados e outras como a concesión de créditos preferentes para manter a competitividade da explotación, así como a flexibilización do cumprimento das obrigas de pagamento da Seguridade Social”, indica González.

Cómpre lembrar que no 2016, ante perdas causadas por unha saraibada en Ribeira Sacra, a Xunta convocara unha liña de axudas para os viticultores afectados.

Desde o ámbito político, formacións da oposición como o Bng xa demandaron a declaración de zona catastrófica e a habilitación de axudas, tanto para paliar danos en vivendas e infraestruturas coma no ámbito agrario.

ACTUALIZACIÓN (17.35 h.)
O conselleiro do Medio Rural, José González, achegouse esta tarde ao concello do Barco de Valdeorras e está previsto que visite tamén ás 19.30 horas o de Monterrei para coñecer de primeira man os danos rexistrados como consecuencia das fortes treboadas e pedrazo que se produciron onte.

No Barco, onde estivo acompañado polo alcalde do municipio, Alfredo García, o conselleiro indicou que ao longo deste día, os técnicos das oficinas agrarias comarcais máis próximas aos concellos afectados identificaron e avaliaron os danos sobre o terreo para coñecer as consecuencias destes episodios meteorolóxicos adversos. No caso concreto dos viticultores, José González sinalou que tamén se está en contacto cos consellos reguladores de Valdeorras e Monterrei para facer unha avaliación conxunta. Desde o consello regulador de Valdeorras, indicáronlle ós medios que calculaban unha afección máxima do 20%.

O conselleiro, pola súa banda, animou ós viticultores a utilizar os correspondentes produtos cicatrizantes nas vides, pois considera que poden ter un efecto moi positivo. González lembrou ademais a importancia da contratación de seguros agrarios de cara a facer fronte a imprevisibles coma os temporais e outras cuestións relativas á meteoroloxía, como o acontecido na tarde de onte. Deste xeito, insistiu, “é a forma máis segura que teñen as explotacións para estar cubertos en caso de que se produzan danos” e minimizar así as perdas ocasionadas.

Máis información
Balance final de afectación por parte dos consellos reguladores.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información