Unións advirte que “queda moito por diante” para evitar fraudes na vendima

Publicidade
Unións advirte que “queda moito por diante” para evitar fraudes na vendima

Unións Agrarias cree que as medidas anunciadas pola Consellería de Medio Rural para a erradicación da fraude no viñedo, “ten elementos positivos e recolle algunhas das demandas feitas polo sector ao longo dos últimos meses”.

Sen embargo, a organización critica que “dentro do panel de accións previstas, non se atopa unha das de maior efectividade como é a posta en marcha dun rexistro público de contratos de compravenda de uva da vendima”.

“Tal como lle transmitiu UUAA en repetidas ocasións ao conselleiro, na actualidade, e pese as obrigas de contractualización que establece a Lei de Cadea, moitas adegas seguen a mercar a uva sen prezo, obrigando a asinar contratos en branco aos produtores para a posteriori establecer cotizacións e volume, o que posibilita a entrada de uva non amparada” polos Consellos Reguladores das Denominacións de Orixe, explica Xosé Ramón González, responsable de Agricultura de UUAA .

Necesidade dunha aprobación de colleita e de establecer rendementos reais para cada zona xeográfica

Por outra parte, a organización agraria ve positivo que se intensifiquen os controis en fincas antes da vendima, “pero sempre en base a o establecemento dun rendemento real que teña en conta a zona xeográfica, o sistema de produción, a variedade de uva e o marco de plantación”, xa que entende que “o uso dun rendemento lineal para toda a denominación, pode levar á entrada de uva foránea polo oco que deixa o rendemento real sobre o rendemento teórico nalgunhas explotacións”.

En todo caso, Unións Agrarias valora o esforzo realizado polo departamento de José González, para implicar a oficina de control de fraudes de Medio Rural, “xa que por ela pasan as entradas e saída de uvas e viño”, pero advirte de que “resulta imprescindible que se coordine de xeito eficiente o seu traballo co dos veedores dos consellos reguladores para evitar duplicidades que resten efectividade”.

Por outra banda, Unións Agrarias cree que para acadar unha mecánica de traballo transparente nos CRDO é imprescindible que unha vez rematada a vendima, se certifique unha aprobación de colleita en todas as denominacións de orixe ligando a este dato a posterior expedición de contraetiquetas.

Finalmente, a organización agraria fai un chamamento para que se convoquen as mesas sectoriais do viño para trazar de consenso o futuro inmediato e a medio prazo do sector do viño de Galicia.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información