Un gandeiro do Barbanza suma 26 baixas polo lobo este ano

Un novo ataque dos lobos deixou en días pasados tres becerros mortos nunha gandería da comarca do Barbanza, unha zona que está a sufrir repetidas incursións e danos por estes animais. En concreto neste caso, o asalto produciuse nunha finca situada a 30 metros das vivendas do lugar de Castelo, na parroquia de Xuño, en Porto do Son. Na noite do domingo para o luns os lobos mataron 3 becerros de seis meses. “Acabábamos de cambialos ese mesmo día para esa finca logo de que remataran o pasto nunha parcela próxima”, concreta o gandeiro afectado, Daniel Fernández.

Os lobos comeron boa parte de dous dos becerros mentres que o terceiro non chegaron a devoralo. Con estas baixas, o gandeiro suma xa 18 poldros e 8 becerros no que vai de ano por ataques dos lobos na súa gandería. Ademais, teme que esta cifra se incremente en dúas máis posto que está a ter dificultades para localizar dúas xovencas.

Prácticas de bo manexo

O gandeiro denuncia que os ataques se produciron pese a que comezou a incorporar prácticas de bo manexo e prevención para reducir a incidencia dos lobos sobre a gandería. Así, entre outras accións, mantén as vacas próximas ó parto e os animais de destete en fincas próximas ós núcleos habitados. “Non hai peche que lles valga e aínda que estean á beira das casas temos danos igual”, concreta Daniel.

Ante esta situación, dende a Asociación de prexudicados pola fauna salvaxe en Galicia (Aperfasa) reclaman reducir a poboación de lobos da Serra do Barbanza. “Precisamos que lle busquen unha solución porque nesta zona é habitual ver mandas de 4 ou 5 lobos polo monte polo día e estamos a ter moitos danos nas ganderías”, concreta Daniel Fernández, que tamén é membro da directiva de Aperfasa.

Ademais, dende o colectivo reclámanlle á Xunta que axilice os procedementos para tramitar as axudas e revise as contías das indemnizacións, posto que “non se corresponden co valor real que teñen os animais e tampouco se está a contemplar o lucro cesante que supón a perda destes animais para a gandería”, reivindican.