Galego
Os baixos prezos que durante o último ano arrastraron os produtos lácteos industriais están a cambiar de tendencia. O Global Dairy Trade (GDT), a poxa de commodities que organiza a neozelandesa Fonterra, acadou esta semana unha suba de cotizacións do 12,7%, que sumada ó aumento da anterior sesión, a inicios de agosto, dá unha suba acumulada de arredor do 20%. Os prezos dos lácteos industriais (manteiga, leite en po, caseína, etc.) chegan así as súas mellores cifras desde outubro do 2015.
Con todo, os niveis do GDT, a principal referencia no mercado internacional de lácteos, continúan a ser baixos, similares por exemplo ós da crise do 2012. As próximas poxas, a celebrar en setembro, serán claves para apreciar se esta tendencia á alza dos prezos se mantén.
Baixada da produción
Que factores explican a mellora do mercado dos produtos lácteos industriais? Os expertos internacionais valoran a redución da oferta de leite como un dos factores determinantes da mellora, segundo recolle hoxe o The Wall Street Journal. Tanto Australia como Nova Zelanda, dous grandes produtores internacionais, reduciron a súa oferta no último ano, o 1,6% no caso de Nova Zelanda e o 2% en Australia.
Nova Zelanda e Australia reduciron entregas no último ano. Agárdase que a UE modere o seu crecemento
A Unión Europea, segundo os últimos datos coñecidos, de maio, mantiña aínda unha produción en aumento en relación ó 2015, se ben confíase nunha moderación do crecemento. O plan que emprenderá Bruxelas en setembro para incentivar reducións voluntarias das entregas de leite terá previsiblemente un efecto positivo sobre o mercado.
En Estados Unidos, a produción tamén medrou nos últimos meses, se ben os baixos prezos do leite están a facer que se reduzan as previsións oficiais de entregas de leite para os próximos meses.
Mellora das exportacións
Outro factor a ter en conta na mellora do mercado é o aumento das exportacións. A reactivación da demanda china permitiu que a UE aumentase un 6% as súas exportacións (en leite equivalente) nos primeiros cinco meses do ano. Nova Zelanda tamén experimentou esa mellora do mercado exportador.
O veto ruso ás exportacións lácteas da UE, Norteamérica e Australia continúa a lastrar as vendas internacionais de lácteos, pero a evolución positiva do mercado en relación ó pasado ano é clara. De continuar a contracción da oferta mundial, os expertos vaticinan a recuperación dos prezos en orixe do leite na última parte do 2016.
