Galego
O grupo holandés de alimentación animal Royal de Heus asinou un acordo para adquirir o fabricante de pensos compostos Núter Feed, actualmente propiedade da financeira Alia Green, que subscribe o capital a través da mercantil Manotcor. A compra supoñerá a implantación de Royal de Heus no mercado ibérico, como o segundo maior comercializador de pensos no mercado libre, posto que ocupa Núter.
Núter Feed, con sede central na Coruña, ten dez fábricas en España, situadas en Aranda de Duero (Burgos), Benavente (Zamora), Colloto (Asturias), Porriño (Pontevedra), San Pedro de Nós (A Coruña), Lugo, Talavera de la Reina (Toledo), Silla (Valencia), Ubeda (Xaén) e Llerena (Badaxoz). A empresa facturou 212,35 Millóns de euros en 2014 e emprega a 330 traballadores.
Conta coa filial Saprogal Portugal, propietaria de dúas factorías no país veciño, situadas en Trofa e Cartaxo. En total, o grupo Núter, propietario das marcas ‘Biona’, ‘Pasaranda’ e ‘Formax’, comercializa 1 millóns de toneladas de pensos anuais e emprega a 500 persoas.
Continuidade no equipo de Núter
Núter vai seguir xestionada polo seu actual equipo directivo, encabezado por Julio Alfonso Múñoz, presidente da compañía, que capitaneou “un modelo de xestión exitoso e independente”, segundo sinala o conselleiro delegado da holandesa, Co de Heus. “Con esta adquisición fortalecemos o noso portfolio e, dado que compartimos unha moeda común, aumentaremos a nosa estabilidade”, declara.
