Novidades á hora de solicitar ás axudas da PAC 2020 en Galicia

Dende o Fondo Galego de Garantía Agraria (FOGGA) informan das principais novidades desta campaña á hora de solicitar as axudas da PAC

Publicidade
Novidades á hora de solicitar ás axudas da PAC 2020 en Galicia

Algo máis de 27.000 gandeiros e agricultores galegos poderán solicitar ata o 30 de abril as axudas da PAC 2020. O orzamento previsto para esta convocatoria elévase aos 216 millóns de euros, dos cales 170 millóns corresponden aos pagamentos directos da PAC e máis de 46 millóns de euros a medidas de desenvolvemento rural (axudas a zonas con limitación naturais, agroambiente e clima, agricultura ecolóxica e para o mantemento de plantacións forestais en terras non agrícolas).

Dende o Fondo Galego de Garantía Agraria (FOGGA) informan das principais novidades desta campaña á hora de solicitar as axudas da PAC:

1) Administración electrónica:

En virtude dun funcionamento efectivo e áxil de xestión, e para favorecer unha introdución gradual na administración electrónica que esixirá a nova PAC, as resolucións individuais estarán dispoñibles nos expedientes electrónicos de cada solicitante a través do Portal de Axudas PAC da web do FOGGA e da aplicación para o móbil SGA APP.

2) Apps para xestión das solicitudes:

Unha das principais novidades para esta campaña é facilitar a transparencia, o acceso á información e á interacción dos beneficiarios na xestión das súas solicitudes. Neste sentido mediante descarga no móbil haberá dúas aplicacións específicas:

SGA APP para que os solicitantes consulten as solicitudes presentadas, declaracións gráficas, controis, cálculo de axudas e estado dos expedientes.
• SGA FOTO co obxectivo de remitir ao FOGGA fotografías xeorreferenciadas cando sexa necesario (alegacións ao SIXPAC, monitorización…).

3) SIXPAC:

Os solicitantes que presenten alegacións ao SIXPAC en recintos que impliquen un cambio de uso en Pastos Permanentes deberán aportar 2 fotografías xeorreferenciadas porque a nova PAC esixirá un papel máis activo do beneficiario para demostrar que cumpre cos requisitos de admisibilidade.

4) Controis mediante monitorización:

Na campaña 2019, Galicia incorporouse a un novo sistema de control coñecido como “monitorización” sendo a única comunidade autónoma da cornixa cantábrica en participar neste proxecto que foi supervisado pola Comisión Europea en outubro de 2019.

A monitorización consiste en utilizar as novas tecnoloxías e as imaxes de satélites e drons para realizar un seguimento do 100% das superficies e do 100% das solicitudes, e determinar se existe actividade agraria.

Para introducir paulatinamente o futuro sistema de control, que será obrigatorio para a nova PAC, nesta campaña o FOGGA estenderá a monitorización aos concellos de Allariz, Baños de Molgas, Maceda, Paderne de Allariz, Xunqueira de Ambía e Xunqueira de Espadañedo, da provincia de Ourense; e de Cerdedo-Cotobade, A Estrada e Forcarei, da provincia de Pontevedra.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información