Medio Rural asegura que recuperará este ano máis de 5.000 hectáreas de terras abandonadas

Publicidade
Medio Rural asegura que recuperará este ano máis de 5.000 hectáreas de terras abandonadas

José González visitando un proxecto piloto en Sober de recuperación de terras abandonadas

A Consellería do Medio Rural asegura que vai mobilizar este ano máis de 5.000 hectáreas de terras agrarias en toda Galicia a través de iniciativas como os polígonos agroforestais, que permitirán poñer en valor terreos en desuso ou abandonados, para que volvan de novo a estar en produción.

O obxectivo de todas estas iniciativas é tamén o de dotar de base territorial ás explotacións, entre outras, de viñedo, como as que predominan nos concellos pontevedreses de Covelo e Crecente, que este venres visitou o conselleiro de Medio Rural, José González, para avaliar as diferentes posibilidades de desenvolver estas actuacións no seu territorio.

Estes proxectos súmanse a outros que debullou o conselleiro, en zonas como Cualedro -para vacún de carne en extensivo-, Curtis -para vacún de leite- ou O Carballiño -para cereal autóctono, orientado a fornecer a Indicación Xeográfica Protexida Pan galego-. A maiores, mencionou o plan para recuperar soutos de castiñeiros e o plan de pasteiros nos que tamén está a actuar a Consellería.

“Trátase -segundo indicou González- de actuar agrupando e poñendo en produción terras, como se viña facendo, e se vai continuar, a través das reestruturacións parcelarias, actuando en grandes superficies de terreo, no canto de ir parcela por parcela, con carácter individual”.

En concreto, no que atinxe a Covelo, o conselleiro explicou que se estuda a posibilidade de crear neste concello unha aldea modelo, cunha orientación produtiva cara a gandaría extensiva e ademais mobilizar pasteiros no lugar da Graña, unha iniciativa esta última que suporía actuar sobre unhas 200 hectáreas cun investimento de máis de 190.000 euros. No caso de Crecente, onde tamén estivo presente o delegado territorial da Xunta en Pontevedra, José Manuel Cores Tourís, González sinalou que se analizan varias opcións de aldeas modelo, xunto cun proxecto de mobilidade de terras relacionado co viñedo no polígono de Vilar.

A maiores, o conselleiro destacou que que a Consellería traballa tamén na roza e limpeza de seis aldeas modelo en diferentes puntos de Galicia e que os labores previstos nelas, e nas máis de 20 que se están a tramitar en toda a comunidade, suporán mobilizar máis de 600 hectáreas.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información