Galego
Ó longo do 2015 saíron ó mercado en todo o mundo 241.000 novos produtos, un 40% deles en Europa. O Cluster Alimentario de Galicia elaborou unha publicación que recolle as principais tendencias nos lanzamentos de alimentos a nivel global. Entre os novos produtos, tres reclamos destacan sobre o resto: ‘Apto para (persoas con alerxias, celiacos, etc.)’, que está presente nun 33% dos produtos, ‘Natural’ (28%) e ‘Ecolóxico / ético’, nun 21%. Recollemos a continuación dez tendencias a ter en conta para o 2016.
1) A orixe como valor: o ‘food telling’
Os consumidores decántanse polos alimentos artesanais, aqueles que se elaboraron con materias primas de calidade e con certificación de orixe. Hai unha procura de alimentos afastados do industrial.
A maiores de satisfacer as súas necesidades fisiolóxicas, o consumidor busca establecer vínculos emocionais, polo que son de especial importancia as percepcións que suxira o produto. Contar a historia do alimento, o ‘food telling’, contribúe a dotar de identidade e autenticidade ás marcas.
2) O natural, amigo número 1
Os produtos con ingredientes naturais e menos procesados son máis atractivos no mercado. Con respaldo científico ou non, os consumidores teñen inquietudes sobre algúns aditivos. Os ingredientes que máis preocupan son os colorantes artificiais, os preservantes e os edulcorantes.
A demanda de procesos naturais que manteñan a calidade sensorial e nutritiva dos alimentos sen aditivos nin conservantes é outra das tendencias en crecemento. O HPP (High Pressure Processing), un procesado non térmico, medrou un 750% nos últimos anos.
Nas sobremesas, o uso de ingredientes naturais concíbese como unha estratexia para facer máis atractiva unha gama de produtos que é percibida polo público como pouco saudable. Os novos lanzamentos de postres con ingredientes naturais en Europa supoñen un 23%.
3) Uso de grans tradicionais
Os grans tradicionais como a chía ou a quinoa gañan protagonismo nas innovacións alimentarias. A súa longa historia de emprego ofrece un grao de confianza para os consumidores que non presentan os produtos procesados. Os grans tradicionais contan ademais con vantaxes obxectivas, como elevados niveis de proteínas vexetais, vitaminas, minerais e maior contido en fibra.
Os cereais de almorzo e as barriñas de cereais son as liñas dominantes que usan estes grans, pero a innovación tamén está a chegar a comidas preparadas, alimentos infantís, iogures e bebidas lácteas.
4) Eco, a nova realidade
A preocupación polo cambio climático e outras cuestións ambientais impulsan o sector dos alimentos ecolóxicos. A sustentabilidade será unha cuestión clave no consumo en Occidente. O desperdicio de alimentos é outra das preocupacións en auxe, polo que formatos e produtos que contribúan a reducir esas perdas, por exemplo alimentos empaquetados en doses, terán maior aceptación no mercado.
5) Saúde, a principal preocupación
O consumidor está preocupado pola obesidade e por problemas de saúde ligados á alimentación. Búscanse graxas e aceites insaturados como o omega 3 e tamén produtos baixos en azucre, con novos ingredientes endulzantes naturais, como o aceite de coco, e baixos en carbohidratos simples, como a fructosa.
A incorporación de froitas e verduras ós ingredientes dun produto contribúe tamén o seu posicionamento como máis saudable.
En Occidente, os consumidores, aínda sen ser vexetarianos, tenden tamén a procurar alimentos que sexan alternativos á carne. Cada vez máis búscase facer comidas algúns días á semana sen consumo de carne.
6) Alimentos funcionais
Os produtos que incorporen ingredientes funcionais, deseñados para mellorar a apariencia física ou o benestar das persoas, é outra das liñas de traballo. Os alimentos que inclúen prebióticos e probióticos, que melloran a flora intestinal, ou coláxeno, para mellorar articulacións e pel, son un exemplo.
7) Produtos relacionados coa nutrición deportiva
O nicho de mercado da nutrición deportiva, centrado en produtos enerxéticos e altos en proteínas, está pasando ó gran consumo da man de ‘claims’ (reclamos) como ‘enerxía para todos os días’ ou ‘saciedade’. Os batidos con proteínas lácteas e os produtos con proteínas vexetais cobran especial importancia neste eido. Tamén se están a explorar nalgúns lanzamentos novas fontes proteícas, como as procedentes de insectos.
8) ‘Comer cos ollos’
As cores e formas novidosas axudan a competir nun mercado saturado de oferta. Procúrase que o consumidor ‘coma cos ollos’ e nesa liña o uso de novas texturas e sabores tamén constitúe un atractivo.
En canto ós envases, impóñense as etiquetaxes limpas con información clara dos ingredientes.
9) Peso das marcas brancas
As marcas brancas coparon o 25% de lanzamentos de novos produtos ó longo do último ano. O consumidor percibe cada vez máis as marcas brancas como dunha calidade axeitada.
10) Top das afirmacións máis usadas nos lanzamentos
As denominacións máis empregadas nos envases dos novos produtos son ‘sen conservantes / aditivos’, ‘envase sustentable’, ‘sen alérxenos’, ‘sen glute’ e as referencias ás redes sociais.
Outras afirmacións con peso foron ‘facilidade de uso’, ‘ecolóxico’, ‘produto sustentable’, ‘baixo en azucre’, ‘baixo en graxa’, ‘halal’ ‘calidade superior’ e ‘apto para microondas’.
