Desmontando os falsos mitos do uso da madeira na construción

Un documental de FSC promove o emprego da madeira certificada e desminte as crenzas sobre os perigos do uso deste material nas edificacións pola humidade ou en caso de lume

Publicidade
Desmontando os falsos mitos do uso da madeira na construción

Instante da presentación do vídeo promocional nunha xornada na que participaron distintos profesionais.

Un documental producido por FSC, coa colaboración do Ministerio de Agricultura, Pesca e Alimentación, pretende acabar cos mitos sobre o emprego da madeira e favorecer a súa utilización na construción, tanto en revestimentos como en estruturas. Nesta peza audiovisual destacados arquitectos e expertos en consumo explican por que as vivendas de madeira volven ser unha opción en alza.

Este traballo audiovisual incide nas posibilidades que ofrece a madeira certificada como material construtivo para este século ó ser unha alternativa sostible, reciclable, rendible e cálida. Ademais, en contra do que puidera pensarse inicialmente, a madeira tampouco se queima nin podrece con facilidade, o que a converte nunha alternativa tamén a ter en conta.

Outro dos puntos fortes que ten a madeira, e que se destaca no vídeo, é o feito de ser un material aliado fronte a crise climática, segundo reivindican dende FSC. A madeira presenta unha menor pegada ecolóxica en comparación con outros materiais de construción, cun balance de enerxía en produción e emisións de gases de efecto invernadoiro inferior ó doutras opcións construtivas.

“A pegada ecolóxica da madeira é boa de por si, porque é un reservorio de carbono, pero ademais, a produción de materiais que proceden da madeira consume menos enerxía e emite menos C02 á atmosfera”, explica Gonzalo Anguita, director de FSC España.

O documental ‘Construír en madeira’ conta con tres versións diferentes. Realizaron unha peza estendida, outra destinada a arquitectos e promotores inmobiliarios e unha terceira dedicada ó gran público. O documental presentouse nunha xornada celebrada en Madrid con máis de 200 profesionais entre arquitectos, promotores e técnicos.

 

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información