Galego
Os próximos meses de febreiro e marzo está previsto que se renoven en Galicia algo máis de 4.000 contratos lácteos, unha boa parte da multinacional francesa Lactalis, que recolle aproximadamente o 25% do leite galego.
Outras como Leche Celta xa renovaron en setembro cunha lixeira suba dos prezos, mentres que Queserías Entrepinares renovará os contratos en abril e Reny Picot en xullo.
A valoración unánime das organizacións gandeiras é que os prezos nos novos contratos teñen que incrementarse para compensar os do ano 2017, nos que subiron moi por baixo da media europea e non estiveron en consonancia co incremento do prezo dos derivados lácteos, sobre todo da manteiga, nos mercados internacionais.
Javier Iglesias (Unións): “Os contratos deberíanse referenciar máis á evolución do prezo da nata”
“En Galicia seguimos tendo un diferencial negativo con respecto ao resto de España duns 2 céntimos de media menos por litro, algo que non se xustifica. Esperamos que na renovación dos contratos compénsese eses 10 meses nos que os nosos gandeiros viron pagado o seu leite bastante por baixo da media europea”, asegura Javier Iglesias, responsable de gandaría de Unións Agrarias.
Neste sentido, o representante de Unións lembra “os prezos da manteiga -onde ademais Galicia lidera as calidades en materia graxa do leite- seguen sendo altos e iso deberíase repercutir nos prezos ao gandeiro”.
A manteiga finalizou o 2017 cun prezo de 4,58 euros o quilo, despois de alcanzar picos ao longo do ano de ata 6 euros o quilo.
Román Santalla: “O modelo que utiliza Lactalis para refenciar os prezos non é legal”
Pola súa banda, o secretario de Gandaría da Unión de Pequeños Agricutores (UPA), Román Santalla, considera que “o modelo que utiliza Lactalis para fixar os prezos non é legal”. “Lactalis recolle o 25% do leite galego e referencia os prezos dos novos contratos aos prezos medios pagos en Galicia nos últimos meses. É dicir, toma como referencia os prezos que en gran medida a propia empresa marca, o cal consideramos que é ilegal e que merecería unha resposta tanto por parte do Ministerio de Agricultura como por parte da Xunta de Galicia”, explica Santalla.
En todo caso, o representante de UPA prevé que “o ano 2018 vai ser mellor para os gandeiros españois en canto a prezos do leite que o 2017, aínda que os contratos seguirán sen reflectir a evolución dos mercados internacionais”.
SLG: “As granxas galegas deixaron de ingresar máis de 9 millóns de euros en novembro por non recibir uns prezos acordes á media europea”
O Sindicato Labrego Galego (SLG) denuncia que “as granxas galegas deixaron de ingresar máis de 9 millóns de euros en novembro por non recibir uns prezos acordes á media europea”.
A organización agraria responde así á valoración da Consellería do Medio Rural, que a pasada semana destacaba que “Galicia foi a comunidade española na que máis medrou o prezo do leite desde novembro de 2015”.
“Certo que o prezo do leite creceu máis porcentualmente en Galicia que en Asturias e en Cantabria; pero mentres as nosas granxas cobraron en novembro unha media de 32 céntimos, segundo os datos dubidosos do Fega, as asturianas ingresaron 35’2 céntimos por litro, e as cántabras 33’2. Se cruzamos os Pireneos, a comparación é deprimente, con prezos medios que superan os 36 céntimos en Francia e Bélxica, ou superiores aos 40 céntimos en Holanda, Alemaña ou Austria. É dicir, Galicia segue tendo o prezo máis baixo do Estado, xunto coas Baleares; á vez que España ten o prezo máis baixo da Unión Europea xunto a Portugal”, advirten desde o Sindicato Labrego.
Así, isto tradúcese, segundo a organización agraria, en que “se as nosas granxas cobrasen en novembro o prezo medio das asturianas ingresarían máis de 5 millóns de euros adicionais do que cobraron por ese mes; e se percibisen o prezo medio da Unión Europea, 37’5 céntimos por litro, o incremento sería de 9 millóns de euros”.
Fruga: “A Consellería tense que deixar de propaganda: os gandeiros necesitan máis base territorial e parar as forestacións ilegais”
Tamén desde a Federación Rural Galega (Fruga) tercian na polémica e acusan á Consellería do Medio Rural de “realizar mera propaganda”.
Así, lembran que “en 2017 os prezos que cobraron os gandeiros e gandeiras galegas foron os mais baixos do estado español (….) á vez que o abandono de explotacións lácteas en Galicia foi moi superior o resto do estado”. En concreto, durante o ano 2017, 424 gandarías galegas de leite pecharon as súas portas, o que represente o 57% do total do estado español, á vez que se seguiu perdendo Superficie Agraria Útil, que se destinou en boa medida a plantacións forestais
“Os gandeiros e gandeiras galegas precisamos de base territorial, co fin de abaratar os custos de produción, e favorecer a produción en base a terra, con prácticas sustentables como pode ser o pastoreo, polo que lle esiximos á Consellería que deixe de investir en propaganda, que a situación dos gandeiros e gandeiras de leite non mellorou con respecto o ano anterior”, asegura Elías Somoza, coordinador de sectores gandeiros da FRUGA.
