Baixada da recría de raza frisoa e suba dos cruces industriais en Silleda

A Central Agropecuaria de Galicia rexistrou este martes unha baixada nos becerros frisóns de recría mentres os cruces industriais subiron. Houbo baixadas nos becerros carniceiros e subas no vacún maior. O porco cebado baixa esta semana e mantéñense sen cambios os leitóns, ovos e o coello

Baixada da recría de raza frisoa e suba dos cruces industriais en Silleda

Animais na Central Agropecuaria de Galicia.

A Central Agropecuaria de Galicia-Abanca rexistrou na sesión deste martes unha baixada dos prezos dos becerros de recría de raza frisoa mentres que os cruces industriais subiron. Nos tenreiros carniceiros a tendencia foi á baixa e no vacún maior houbo un incremento dos prezos. Nas mesas de cotización decidiuse unha baixada do porco cebado, mentres os leitóns e os ovos se manteñen sen cambios.

No referido ó gando de recría, nos becerros frisóns rexistrouse unha baixada dos prezos en tódalas categorías. Nos animais de menos de 20 días o prezo situouse nos 64 euros de media, 11 menos que a semana pasada. Nos becerros de entre 20 e 50 días a baixada foi de 8 euros quedando nos 85 euros. Os animais de máis idade, os de máis de 50 días, rexistraron a baixada máis significativa, cunha redución de 33 euros ata os 81 euros, un prezo máis baixo do de becerros da categoría inferior.

Nesta feira, a recría de cruces industriais rexistrou subas en tódalas seccións. Nos becerros máis novos, de menos de 20 días, incrementouse 1 euro o prezo con respecto á semana pasada e sitúase nos 277 euros. Os animais de entre 20 e 50 días cotizáronse a 317 euros, 6 euros máis e nos becerros de máis de 50 días a suba foi de 70 euros ata acadar os 458 euros de media.

Nos becerros carniceiros a tendencia foi á baixa e no caso dos frisóns, a baixada foi de 7 euros quedando nos 542 euros. Nos animais de cruces industriais, os machos situáronse en 817 euros, 1 euro menos que na feira anterior, e as femias acadaron os 743 euros de media, 15 euros por debaixo do marcado hai unha semana.

No gando vacún houbo unha tendencia á alza. No caso das vacas de primeira a suba foi de 1 euro, ata os 1.080 euros e nas vacas de segunda categoría o prezo incrementouse en 24 euros para acadar os 725 euros. Mentres, nas vacas de desvelle houbo unha baixada de 30 euros para situarse nos 415 euros de media.

Central-Agropecuaria-de-Galicia--15_10_2019-Vacuno

Baixada no porcino

Nesta xornada, as mesas de cotizacións do porcino acordaron unha nova baixada do porco cebado que foi, ó igual que nas semanas pasadas, dos 0,01 ós 0,013 euros por quilo, dependendo da categoría. No caso do porco cebado selecto e normal a baixada foi de 0,01 euros e o prezo quedou en 1,465 e 1,440 euros o quilo respectivamente. A categoría de Canle II foi a que rexistrou unha maior baixada, de 0,013 euros e pasa a cotizarse a 1,870 euros o quilo. Nos animais de desvelle mantívose o prezo entre os 0,73 e os 0,79 euros.

Nos leitóns non houbo variacións esta semana. O bacoriño de 20 quilos procedente dunha única granxa mantense en 58 euros e os animais chegados de varias ganderías cotízanse a 53 euros. O prezo por quilo é de 2,9 e 2,65 euros respectivamente.

Os ovos mantivéronse sen cambios nesta xornada. Así, a ducia da categoría XL quedou nos 1,43 euros; a da L págase a 1,27 euros, a M e a S cotizaron a 1,13 e 0,92 euros a ducia, respectivamente.Tampouco houbo variacións esta semana no prezo da galiña de desvelle, que continúa nun intervalo de 0,08 e 0,16 euros o quilo.

E no relativo ó coello, a Lonxa de Madrid mantivo o prezo en 2,30 euros o quilo.

Central-Agropecuaria-de-Galicia--15_10_2019-Porcino

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información