O control gubernamental sobre a cadea alimentaria saldouse coa apertura de 110 expedientes sancionadores desde xaneiro do 2014, se ben a principal reclamación do sector produtor, a venda a baixos prezos do leite e doutros produtos agrarios, non é investigada nin sancionada pola Axencia de Control e Información Alimentaria (AICA), que lembra que non ten competencias na materia. A AICA, dependente do Ministerio de Agricultura, está a facer un exhaustivo seguemento sobre cuestións coma os prazos de pago ou a existencia de contratos entre os distintos operadores, pero no sector produtor interprétase que o seu labor está a quedar a medias.
A Axencia de Control Alimentario iniciou a súa actividade en xaneiro do 2014 para velar polo cumprimento da Ley 12/2013 de la Cadena Alimentaria. Desde entón e ata o 30 de abril, a Axencia realizou un total de 555 inspeccións e abriu 110 expedientes sancionadores. Deses expedientes pecháronse 23, con 9 sancións; en tanto os 87 casos restantes están en fase de alegacións.
A AICA recibiu 78 denuncias, 40 delas correspondentes ó sector lácteo
Case todas as sancións se deberon a que as empresas non contestaron ós requerimentos da AICA, salvo dúas multas motivadas pola falta de contrato.
A maiores das inspeccións realizadas de oficio, a Axencia comproba as denuncias recibidas. Desde xaneiro do pasado ano e ata o 30 de abril do 2015, chegaron á AICA 78 denuncias, 40 delas correspondentes ó sector lácteo. Das denuncias recibidas, 57 están en investigación, 13 foron desestimadas e abríronse 3 expedientes sancionadores, un xa concluido cunha infracción leve por non contestar a empresa ós requerimentos do organismo.
En total, xa que logo, a AICA propuxo polo de agora 10 sancións, das que 7 afectaron á distribución minorista e 3 á maiorista.
Denuncias por vendas a perdas
Un dato a destacar das denuncias recibidas pola Axencia é que o 45% delas se corresponde coa comunicación de posibles vendas a perdas de produtos agroalimentarios nas cadeas de distribución. A Axencia, no balance de resultados que vén de presentar, advirte de que non ten competencias para investigar a venda a perdas, prohibida pola Ley del Comercio Minorista, pero non pola Ley de la Cadena Alimentaria.
Ante esta situación, a AICA actúa trasladándolle toda a información ós correspondentes gobernos autonómicos, con competencia na materia. Ata agora, Agricultura envioulle 260 comunicacións ás consellerías autonómicas para que investiguen estas prácticas e apliquen as sancións oportunas, de ser o caso.
O Ministerio envioulle 260 comunicacións ós gobernos autonómicos sobre posibles casos de vendas a perdas
Entre o sector produtor, hai reticencias a esa delegación das sancións nas autonomías, pois enténdese que algúns dos grandes polos de consumo, caso de Madrid, poden ter máis en conta o beneficio que supón para o consumidor un baixo prezo antes que o perxuízo que provoca nos produtores. Polo de agora só se coñecen sancións por vendas a perdas en Murcia e Cantabria.
En Galicia denunciouse recentemente a venda de leite a 50 céntimos nunha cadea de supermercados, sen que por agora trascendese ningunha actuación ó respecto. A AICA adoita resolver os expedientes nunha media de 5 meses, un prazo moi inferior ós 12 meses de marxe que ten por lei.
Inspeccións por sectores
Das 555 inspeccións realizadas pola AICA, 352 foron no sector de froitas e hortalizas, 87 no aceite de oliva, 80 no leite e 36 na carne de polo.
A actividade inspectora do organismo céntrase nos maioristas -principalmente nos de froitas e hortalizas-, que acumulan o 72% das inspeccións. O segundo polo de control son as cadeas da distribución comercial (hipermercados, tendas de desconto, supermercados, etc.), co 24% do total. Industria agroalimentaria, co 2%, e produtores, con outro 2%, completan o labor do organismo.
A maioría dos expedientes abríronse contra maioristas e distribución. Hai un caso contra unha industria láctea
Os expedientes sancionadores abertos a raíz das inspeccións manteñen porcentaxes similares. Dos 110 expedientes abertos, 79 correspóndense a maioristas, 27 á distribución comercial, 2 a produtores de froitas e hortalizas e 2 a industrias agroalimentarias, unha de carne de polo e outra de leite.
O 80% dos expedientes débese ó incumprimento de prazos de pago e/ou á falta de contratos, en tanto os restantes casos veñen motivados sobre todo pola falta de resposta ós requerimentos da Axencia.
Máis información
Informe completo da actividade inspectora da AICA