Acusan á Xunta de “posicionarse do lado da bichería” ante o aumento dos ataques dos xabaríns

Acusan á Xunta de “posicionarse do lado da bichería” ante o aumento dos ataques dos  xabaríns

Finca de millo estragada polos xabaríns esta semana en Lalín.

O sindicato Unións Agrarias denuncia o incremento dos ataques das mandas de xabaríns a parcelas de millo nas comarcas do Deza, Terra de Montes e Tabeirós e advirte de que “a Consellería do Medio Ambiente está a posicionarse do lado da bichería” e non dos gandeiros.

“Aínda que o millo está sen espigar, xa son numerosos os ataques desta especie salvaxe, que se producen incluso a plena luz do día e preto das casas”, denuncian dende a organización agraria, que considera que a poboación de xabaríns está aumentando de xeito descontrolado, provocando cada vez máis danos á xente que realiza actividades agrarias e gandeiras, e ante o que consideran “pasividade” por parte da Xunta de Galicia.

Segundo Unións Agrarias, a situación máis grave dáse nas zonas limítrofes con zonas vedadas ou de reserva de caza, onde a presión dos xabaríns “vólvese inaguantable” para agricultores e gandeiros.

“O xabarín xa non respecta pastores e cercas eléctricas, e pola falta de humidade no chan está empezando a estragar parcelas de millo”, engaden.

“A Consellería de Medio Ambiente posiciónase de lado da bichería”

Todo isto está a levar, segundo o sindicato a unha redución das hectáreas sementadas de millo año tras ano nas comarcas do Deza, Tabeirós e Terra de Montes. “Este ano 2017 púidose reducir a terra sementada en máis dun 10%, o que leva consigo un maior aumento dos custos de produción para os gandeiros”, advirten.

Ante esta situación, Unións demándalle á Xunta que autorice batidas con axilidade para dezmar o que considera “superpoboación” de xabarín nestas comarcas e indemnizacións para as persoas que sufran estragos nas súas colleitas.

Ademais, o sindicato pídelle á Xunta que “os afectados poidan gardar as súas fincas e abater, chegado o caso, aos xabaríns, sen que lle poidan caer multas por defender a comida das vacas, dos porcos ou das galiñas”.

E é que, segundo denuncia Unións, na situación actual “a Consellería do Medio Ambiente está a posicionarse do lado da bichería e está deixando abandonado o mundo rural”.

Testemuños: “A única medida efectiva é autorizar máis batidas e esperas nocturnas”

José Antonio Louzao é un gandeiro de Graba, en Silleda, que nas últimas semanas está a sufrir os ataques dos xabaríns nas súas parcelas. “A pasada semana xa entrou unha manda de 8 nunha leira de millo, a pesar de que aínda non ten espiga, e onte segando na herba seca vin a outra manda de 14 animais”, asegura.

“O problema é que cada vez hai máis xabaríns, nunca se viron tantos, e agora os ataques son incluso a plena luz do día e preto das casas”, denuncia.

A solución que propón José Antonio é que a Consellería de Medio Ambiente autorice máis batidas e con máis axilidade e que se autoricen tamén as esperas nocturnas. “Do contrario, teremos que deixar de sementar millo”, advirte.

Jaime Fernández: “Os ataques dos xabaríns estragaron entre o 15 e o 20% do millo”

Jaime Fernández, da parroquia de Cercio, en Lalín, é outro dos gandeiros afectados nesta comarca polos ataques dos xabaríns. Explica que “na noite do luns entrou unha manda de xabaríns nunha leira de millo de 2,5 hectáreas e estragou entre o 15 e o 20%”.

Lembra que “a sementeira do millo vale moito diñeiro” polo que asegura que “se seguimos con estes ataques teremos que deixar de cultivalo, porque con estas perdas non compensa”.

 

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información