Galego
A Estación Fitopatolóxica de Areeiro, centro dependente da Deputación de Pontevedra, informa no seu boletín fitosanitario desta semana da situación sanitaria dos viñedos na provincia de Pontevedra.
Mildiu:
Durante os últimos días houbo, sobre todo nas comarcas vitivinícolas do Salnés e de Ribeiras do Morrazo, pero tamén no resto, condicións climatolóxicas favorables ao desenvolvemento do mildiu. En concreto, temperaturas mínimas de sobre 12-13 ºC as noites do 17, 18 (nalgunhas zonas), e o 20. Estas temperaturas nocturnas coincidiron con humidade foliar durante 6-8 horas nas tres primeiras xornadas mencionadas. Ademáis, durante as horas do día chegaron a acadarse os 18-20 ºC á vez que había ceos alternando nubes e claros e/ou algunhas gotas localmente. É dicir, unha climatoloxía de tipo tormentoso que favorece as contaminacións do mildiu.
As mencionadas condicións, e en realidade a climatoloxía inestable que vimos sufrindo practicamente todo o mes e que da lugar a contaminacións case continuas, tiveron o seu reflexo nas viñas: apareceron as primeiras manchas nas parcelas que aínda non tiñan manifestado a enfermidade, e tamén naquelas onde xa se aplicara o primeiro tratamento, unha situación xeneralizada en todos os viñedos e variedades.
“En ningún caso topamos síntomas en acio e as manchas eran moi recentes, con frutificación apenas iniciándose, agás nas zonas de avance a partir de manchas antigas”, precisan os técnicos de Areeiro. Outros técnicos e viticultores da práctica totalidade de comarcas informaron de idéntica circunstancia.
Por iso, porque ao longo da semana houbo precipitacións de ata 40-50 l/m que reduciron a protección dos produtos, e tamén porque as previsións meteorolóxicas seguen a anunciar tempo inestable a partir da fin de semana, a recomendación da Estación Fitopatolóxica de Areeiro é aplicar un novo tratamento antes de que se produzan novas choivas, salvo que xa se aplicara nestes días e que na revisión das viñas se poida comprobar que non aparecen novos síntomas nin zonas de avance nos antigos”.
Nas xornadas seguintes á aplicación lembran a conveniencia de revisar as viñas, en especial se a fixeron con algo de vento, con humidade nas follas, ou se choveu ao pouco de finalizala. “En todos os casos, extremen a vixilancia” aconsellan.
Oídio:
As condicións climatolóxicas destes días son relativamente favorables a este patóxeno, pero segundo a tendencia dos últimos anos en xeral é cedo para que aparezan os primeiros síntomas. Aínda así, aconséllase incrementar a vixilancia.
Black-rot:
Na revisión anterior os técnicos de Areeiro observaron o primeiro síntoma en dúas viñas. “Pois ben, -subliñan- esta semana notamos un incremento na presenza de síntomas nas plantas da viña abandonada do Condado e tamén aumentou o número de parcelas con algunha pequena mancha”.
A recomendación é manter a vixilancia e, nas viñas con historial desta enfermidade, poden elixir materias activas con efecto tamén fronte a este patóxeno, pero dando prioridade a aquelas que teñan efecto curativo fronte ao mildiu.
Botrite:
Malia humidade relativa tan elevada que temos estes días (que se mantén por riba do 80% e mesmo acada o 100% en moitos momentos), as temperaturas bastante cálidas nas horas centrais que tivemos, e as feridas causadas pola sarabia ou pedrazo que caeu localmente, os técnicos da Estación de Areeiro informande que non apareceron apenas síntomas desta enfermidade nas viñas que revisaron.
Porén, e aínda que para os dous días seguintes hai previsións de mellor tempo, lembran que de cara á fin de semana parece que volven as choivas, polo que haberá que incrementar novamente a vixilancia.
Outros:
Advirten novamente do incremento de caracois e lemas, que están a deixar algunhas follas moi afectadas. Estes son animais de hábitos nocturnos que de día se poden topar nos postes, na zona entre estes e as cepas ou mesmo tamén detidos nas follas.
Nas plantas adultas non deberían causar maiores problemas, pero en plantacións novas, se a presenza de danos é alarmante, poden considerar poñer no solo algún produto autorizado en viña a base de fosfato férrico ou metaldehído, as dúas únicas materias activas que para estas pragas aparecen no Rexistro de Productos Fitosanitarios do Ministerio”, aconsellan dende a Estación Fitopatolóxica de Areeiro.
