Galego
O Observatorio do mercado lácteo vén de facer públicos os datos de produción de leite do primeiro trimestre do ano (xaneiro – marzo), que confirman unha tendencia xeral á redución das entregas en comparación co primeiro trimestre do 2014. O perigo da supertaxa na última campaña na que estiveron en vigor a cota, que rematou o 31 de marzo, explican en boa medida esa baixada das entregas, se ben, a moderación da produción continuou no mes de abril nalgúns dos principais países leiteiros, como Alemaña ou Francia, que seguen a facer entregas por baixo das do 2014.
No primeiro trimestre do ano, a redución da produción constatouse na maioría dos grandes países produtores da UE, caso de Francia (- 2,7%), Alemaña (-1,4 %), España (- 0,8%), Italia (- 1,2 %) ou Irlanda (- 4,3 %). Pola contra, houbo outra parte de países que creceron no primeiro trimestre, caso de Portugal (+5,5 %), República Checa ou Hungría.
No global da campaña 2014-2015, a produción medrou na práctica totalidade de países, cun crecemento medio na UE-28 do 2,8%, segundo os datos do Observatorio Europeo. Os bos prezos da primeira parte da campaña contribuiron a ese aumento da produción, situación contraria á que se rexistra no inicio da campaña 2015-2016, na que os baixos prezos están a levar á moderación das entregas de leite.
