Galego
Un total de 43 empresas galegas participan na Feria Nacional del Vino “Fenavin”, que se celebra dende hoxe e ata o vindeiro xoves en Ciudad Real.
Nesta edición de Fenavin están representadas as cinco denominacións de orixe de viños de Galicia (Ribeiro, Rías Baixas, Valdeorras, Ribeira Sacra e Monterrei) e as indicacións xeográficas de augardentes e licores tradicionais da nosa Comunidade. En total, as 43 empresas galegas do sector ocupan unha superficie expositiva de 308 m2 en dúas “illas” expositivas situadas nos pavillóns 3 e 4 da feira.
A Consellería do Medio Rural e do Mar colabora coa promoción dos viños e augardentes galegos asumindo parte do custe do chan do certame e participando activamente na coordinación da asistencia conxunta da representación da nosa Comunidade baixo a marca “Galicia”.
Datos de Fenavin
Esta é a oitava edición de Fenavin, feira organizada pola Deputación de Ciudad Real e que está considerado o certame monográfico de referencia do viño español, especializándose desde os seus inicios no negocio exterior.
Fenavin 2015 reúne a 1.361 adegas españolas con viños de todas as denominacións de orixe do país e conta con 29.200 m2 de exposición distribuídos en 7 pavillóns. Está prevista a participación duns 12.000 compradores nacionais e 3.200 internacionais (procedentes de máis de 65 países) e a realización de 180.000 contactos comerciais.
A directora xeral de Produción Agropecuaria, Patricia Ulloa, desprazouse ata esta localidade castelá manchega para apoiar coa súa presenza a promoción dos viños e augardentes galegos neste certame.
