Un DNI electrónico para o viño a nivel mundial

A empresa alemá Bruker desenvolve un Banco de Viños Mundial a partir de identificación por resonancia magnética nuclear. Prevese que o sistema axilice as exportacións e evite fraudes. A Estación Enológica de Haro (A Rioxa), a única autorizada en España para levar a base de datos española do banco acaba de presentar a súa proposta en Galicia

Un DNI electrónico para o viño a nivel mundial

Eva Rituerto na presentación do equipo de Resonancia Magnética Nuclear da Estación de Haro

Unha pegada dactilar do viño obtida mediante Resonancia Magnética Nuclear (RNM) que permita certificar a orixe dun viño en calquera parte do mundo, facilitando as exportacións e evitando fraudes. Este é o obxectivo da iniciativa posta en marcha pola multinacional alemá Bruker, fabricante de equipos de RNM cun software adaptado para identificación de viños, que deu tamén o paso de crear un Banco de Viños Mundial, a partir das bases de datos cos perfís de viños de cada país, rexión, adega e mesmo anada.

O proxecto, xa en marcha, chegou a España a través da Estación Enológica de Haro, dependente do Goberno de La Rioja, e que o ano pasado adquiriu a Bruker un dos seus equipos de Resonancia Magnética Nuclear. O obxectivo para este ano é engadir a ese Banco de Viños Mundial a uns 3.500 viños españois, dos que 200 serán galegos, procedentes das cinco denominacións de orixe.

Precisamente, a responsable da área de Resonancia Magnética Nuclear da Estación de Haro, Eva López Rituerto, presentou o pasado venres en Ourense este novo sistema dentro das xornadas técnicas “Retos e oportunidades para o mundo do viño”, organizadas pola Estación de Viticultura e Enoloxía de Galicia (Evega), unha das entidades colaboradoras coas que conta a Estación de Haro para a extensión do “wine profiling”.

En 20 minutos obtense o perfil dun viño, detectando ata 52 compostos

Eva López destacou que a resonancia magnética nuclear é unha técnica emerxente no sector do viño, xa que “permite certificar a orixe por país, rexión e mesmo adega, así como a variedade e a anada dos viños”.

Tal grao de precisión lógrase a partir da análise dunha pequena cantidade de viño, uns 900 mililitros, do que se obteñen unha serie de imaxes espectrais no equipo de resonancia. “O proceso dura uns 20 minutos, e a diferenza dos perfís cromatrográficos, a técnica máis utilizada ata agora, permite un maior grao de precisión e ofrece máis cantidade de datos”, sinalou Eva López Rituerto. Así, ata 52 compostos logra discernir nun viño, desde aminoácidos, a polifenois, glicosa, etanol ou azucres e cun grao de fiabilidade próximo ao 100%.

“A principal vantaxe -explicou a responsable da Estación de Haro- é que vai facilitar moito as importacións e as exportacións, xa que o dispoñer dunha base de datos mundial coa pegada dactilar de cada viño mellorarase a trazabilidad e a seguridade, evitando fraudes e posibles sabotaxes”. Así, por exemplo, para certificar a autenticidade dun viño nunha poxa, e sen necesidade de abrir a botella, abondará con extraer 2 mililitros cun pequeno pinchazo no rolla.

“O seu custo roldará os 300 euros por análise”

Ademais, desde a Estación de Haro destacan que cada adega pode obter a súa propia “pegada dactilar”, un selo único que lle servirá como carta de presentación ante clientes de todo o mundo, achegando un valor engadido aos seus viños. Os Consellos Reguladores tamén poderán utilizar esta técnica para as certificacións de calidade e o control de viños.

En canto ao prezo, o seu custo roldará os 300 euros por análises e incluirá a analítica completa do viño e a obtención do certificado ou pegada dactilar.

Por último, lembrar que a Resonancia Magnética Nuclear é unha técnica que xa veu sendo utilizada pola Universidade de Santiago de Compostela para clasificar as variedades de vide autóctonas de Galicia. Precisamente, un dos asistentes, membro do equipo de RNM da USC, criticaba o feito de que “a rede internacional ou Banco Mundial de Viños sexa propiedade dunha empresa privada, que é a que comercializa os aparellos de RNM, co que busca converter aos clientes en fixos, perpetuos e prisioneiros”.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información