Recomendacións para o coidado da viña durante esta semana

Publicidade
Recomendacións para o coidado da viña durante esta semana

Na maioría das viñas os gromos xa están ben desenvolvidos

A Estación Fitopatolóxica de Areeiro, centro dependente da Deputación de Pontevedra, ven de emitir un boletín sobre o estado fitopatoloxico do viñedo, pataca, e froiteiras. Velaquí as súas recomendacións:

Viñedo: 

Mildeu:

En xeral, as temperaturas que se deron durante as noites e as primeiras horas da mañá do mes de abril, momento desde o que podemos considerar que hai gromos ben desenvolvidos, son frescas (valores medios ao redor de 7-9 º C na maioría das estacións). Polo tanto, non foron favorables ao desenvolvemento do fungo do mildeu.

Con esta situación, a día de hoxe o desenvolvemento teórico do mildio segundo Goidanich ronda o 30-40% nas diferentes estacións consultadas da DO Rías Baixas, só acadando o 56-58% en Bueu-Cabo Udra e Cangas Porto da IXP Ribeiras do Morrazo.

Na visita realizada a pasada semana a parte das parcelas da nosa rede non observamos os primeiros síntomas da enfermidade, nin tampouco ata este momento nos informaron de que teñan aparecido noutras fincas. Aínda así, as previsións das diferentes axencias meteorolóxicas, que ben é certo que non coinciden estritamente canto aos períodos de precipitación previstos para os próximos días, anuncian que, salvo esta fin de semana, vai haber tempo novamente  húmido para a semana entrante e con choivas de xeito intermitente ou continuo, aínda que tamén prevén temperaturas bastante baixas.

Tendo en conta estes datos, e o momento sensible da fenoloxía da planta, se non fan revisións periódicas aos viñedos, podería ser interesante protexer as viñas de xeito preventivo antes de que se inicie este período de precipitacións. No caso de facerse seguimentos na procura da primeira mancha (que soe, aínda que non sempre, aparecer nas follas da base do gromo), estes deben ser máis ou menos reiterados segundo se confirmen (ou non) as previsións meteorolóxicas.

No caso de intervir elixan preferiblemente un produto sistémico unido a un contacto. E non esquezer axustar o volume de caldo ao desenvolvemento da vexetación (nestes momentos o gasto de caldo debe ser inferior), así como manter en bo estado as  boquillas e demais elementos dos equipos de tratamento para evitar gastos innecesarios e reducir tamén problemas para a saúde das persoas e o medio ambiente.

Pedroulo e outros gurgullos:

Os técnicos de Areeiro informan de que “non vimos síntomas destes insectos nas viñas que visitamos, nin sequera nas máis atrasadas, que puntualmente sería onde poderían causar certos danos”.

Ácaros: 

Nos inicios da campaña poden observarse síntomas que semellan aos producidos pola acariose pero que en realidade son consecuencia das condicións ambientais. Así, nas mostras que recollidas polos técnicos de Areeiro nas parcelas de seguimento e noutras que visitaron non atoparon exemplares observando as follas no laboratorio. Nalgunhas fincas, pola súa parte, si se aprecian síntomas de  erinose, pero sen importancia.

Danos por vento e/ou sarabia: 

Hai viñas, sobre todo na área de influencia da IXP Ribeiras do Morrazo, que presentan danos nas follas e rotura de gromos polos efectos destes factores ambientais. Non son moi xeneralizados pero nas fincas onde se presenten á conveniente aplicar un produto que leve folpet cando fagan a primeira intervención fronte ao mildio.

Maceiras:

Moteado:

De momento non temos observado síntomas, pero naquelas plantas de variedades sensibles que chegan a ter danos na froita en todas as campañas pode aplicarse un tratamento preventivo pensando no período de humidade elevada e continua que, segundo parece, vai vir despois da fin de semana. Ademais, procuren elixir un funxicida que leve unha materia activa cicatrizante (tipo captan) para protexer as feridas nas follas que se observan nalgunhas zonas.

Kiwi:

Bacteriose:

Está iniciándose o estado fenolóxico botóns florais visibles (estado E1)  e coincide cun período húmido, polo que é recomendable aplicar un tratamento cúprico para limitar os danos que poden causar estas patoloxías sobre a futura floración. Dado o carácter preventivo destas intervencións, deben renovarse segundo o período de protección do funxicida empregado se a climatoloxía continúa húmida, polo menos ata a apertura da flor.

No caso destas enfermidades é sabido que o control preventivo é imprescindible. Ademais, non esquezan a importancia da hixiene a nivel de calquera maquinaria, roupa ou utensilios necesarios nas plantacións (evitan a dispersión da bacteria), o abonado equilibrado (nunca realizar achegas desequilibradas de nitróxeno,e), etc.

Pataca:

Mildio:

Co tempo húmido haberá que prestar moita atención á aparición de síntomas desta enfermidade ou, se non se realiza unha vixilancia do cultivo, será conveniente tratar.

Escaravello:

Detectamos os primeiros individuos adultos nesta campaña sobre plantas xa ben desenvolvidas.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información