Galicia vendeu en 2014 máis de 35 millóns de litros de viño

O secretario xeral de Medio Rural e Montes, Tomás Fernández-Couto, inaugurou a VI edición do Salón do Viño e Licores Galegos de Calidade – Vinis Terrae

Galicia vendeu en 2014 máis de 35 millóns de litros de viño

Tomás Fdez. Couto na inauguración de Vinisterrae

O sector vitícola galego comercializou o ano pasado máis de 35 millóns de litros de viño, augardente e licor. Así o destacou esta mañá o secretario xeral de Medio Rural e Montes, Tomás Fernández-Couto, na inauguración da VI edición do Salón do Viño e Licores Galegos de Calidade-Vinis Terrae.

O secretario xeral sinalou que eventos coma este convértense en centros de negocios e permiten reunir a distintas denominacións de orixe e adegas baixo un mesmo teito. Reiterou que para a Xunta de Galicia é fundamental apoiar a comercialización dos produtos da vide e por iso “unha das nosas prioridades é impulsar a súa proxección exterior a través da promoción de mercados e feiras como a que hoxe nos reúne”, dixo Fernández-Couto, ao tempo que recalcou que o futuro deste sector pasa pola exportación.

Vinis Terrae

O salón Vinis Terrae celébrase en Expourense hoxe e mañá. Neste encontro pequenas e medianas adegas adscritas ás denominacións de orixe Ribeiro, Ribeira Sacra, Monterrei, Valdeorras, Rías Baixas, e Aguardentes e licores Tradicionais de Galicia exporán as calidades dos seus produtos. Esta edición da feira contará coa presenza de preto dun cento de importadores e compradores de 19 países que terán a oportunidade de coñecer as últimas anadas das 80 adegas adscritas ás cinco D.O. galegas.

Vinis Terrae busca facilitar a comunicación entre os produtores galegos e os comercializadores españois e internacionais co fin de que acaden acordos comerciais que lles permitan situar os viños e licores nos seus mercados.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información