Galego
Despois de 50 días de intensa actividade nos viñedos e adegas, a Denominación de Orixe Ribeira Sacra deu este venres por finalizada a vendima cun total de 6,19 millóns de quilos de uva recolleitos, 1,4 máis que o pasado ano, e un bo estado sanitario que augura “unha colleita de moi boa calidade”.
O pasado 28 de agosto comezaba a vendima en Ribeira Sacra para aquelas adegas que polas características e localización dos seus viñedos facían que a uva cumprise os parámetros esixidos polo Consello Regulador. O día 15 de setembro era a data oficial recomendada para o inicio da vendima.
Durante os días que durou a vendima as condicións meteorolóxicas foron moi favorables, xa que as choivas foron escasas e puntuais e o bo tempo predominou durante toda a campaña de recollida. “A uva entrou nas adegas nun estado sanitario bo polo que se prevé que a colleita sexa de moi boa calidade”, destacan desde o Consello Regulador.
A Mencía é a variedade hexemónica en tintos e o Godello en brancos
A cantidade total de quilos recolleitos nesta campaña polas 95 adegas inscritas no Consello Regulador é de 6.194.780, o que supón 1,4 millóns máis de quilos que na campaña anterior na que se recolleron 4.773.674 millóns. En liñas xerais cumpríronse as previsións coa que contaba o Consello Regulador ao comezo da campaña.
As tarefas de control de calidade e orixe durante a vendima nos viñedos e adegas da denominación de orixe, levouse a cabo polo persoal técnico do Consello Regulador, que ademais contou co reforzo de 13 técnicos veedores contratados especialmente para a época de vendima.
A cantidade de quilos diferenciada por variedades é:
Mencía: 5.235.869
Brancellao: 41.216
Merenzao: 52.996
Caiño: 6.743
Garnacha: 332.250
Mouratón: 7.195
Sousón: 47.339
Tempranillo: 88.062
Total Variedades Tintas: 5.811.670 kgs.
Albariño: 66.891
Doa Branca: 7.023
Godello: 265.381
Loureira: 1.139
Torrontés: 3.198
Treixadura: 39.478
Total Variedades Brancas: 383.110 kgs.
