Galego
A organización da Feira do Viño do Ribeiro (Concello de Ribadavia e CRDO Ribeiro), que este ano alcanza a súa 56ª edición e terá lugar os días 3, 4 e 5 de maio de 2019 en Ribadavia, presentou este martes o seu programa no Pazo de Quián, en Sergude (Boqueixón).
No acto interviron José González, Conselleiro de Medio Rural; Ignacio Gómez, alcalde do Concello de Ribadavia; Juan Casares, Presidente do CRDO Ribeiro e Alén Tarrío, cociñeiro do Pampín Bar e representante dos cociñeiros e sumiller que participarán nas actividades deste ano.
O conselleiro de Medio Rural, José González, destacou a importancia histórica do viño do Ribeiro durante séculos pasados e que debe ser o punto no que apoiarse para avanzar no futuro. Tamén sinalou que a Feira do Viño do Ribeiro, senlleira dentro das festas vitivinícolas que se celebran en Galicia, cada ano aumenta o seu número de participantes e de público que se achega a Ribadavia para gozar deste evento.
Pola súa parte, o alcalde de Ribadavia, Ignacio Gómez, fixo mención especial ás numerosas actividades que se levan a cabo para dinamizar a FVR como as catas, showcooking, cata popular, Bus turistico, etc., e que fan que, ano a ano, o evento consiga acadar unha maior dimensión.
Asemade, o presidente do CRDO Ribeiro, Juan Casares, indicou o papel como eixo de desenvolvemento que exerce o viño na comarca do Ribeiro e facendo tamén unha chiscadela ao pasado para tratar de ter un próspero futuro.
Finalmente, o cociñeiro representante das actividades enogastronomicas, Alen Tarrío, ensalzaba a labor que están a facer os produtores de viño en Galicia, e en especial no Ribeiro, destacando o nivel de calidade dos viños que se elaboran hoxe en día.
Pódese consultar todo o programa e as actividades na web do evento www.feiravinoribeiro.com
