Case corenta adegas da DO Rías Baixas mostran os seus mellores produtos a unha quincena de importadores europeos

O Auditorio Mar de Vigo acolle onte e hoxe esta misión comercial inversa, organizada pola Cámara de Comercio de Vigo e a Zona Franca, na que compradores de Bélxica, Holanda, Alemaña, Polonia e Reino Unido realizarán un total de 570 catas de viño

Publicidade
Case corenta adegas da DO Rías Baixas mostran os seus mellores produtos a unha quincena de importadores europeos

Teresa Pedrosa visitando a zona de cata

Case corenta adegas da D.O. Rías Baixas mostran desde onte os seus mellores produtos na misión comercial inversa de viños organizada pola Cámara de Vigo e a Zona Franca, en colaboración coas Cámaras de Vilagarcía de Arousa e Pontevedra, e a Denominación de Orixe Rías Baixas.

Teresa Pedrosa, delegada do Estado no Consorcio da Zona Franca de Vigo e José García Costas, presidente da Cámara de Comercio de Vigo, acudiron onte á inauguración deste encontro europeo no que participan unha quincena de importadores do sector procedentes de Bélxica (3), Holanda (2), Alemaña (5), Polonia (2) e Reino Unido (3).

Durante a súa intervención, Teresa Pedrosa resaltou que é unha satisfacción ver o bo resultado que están a ter estas misións comerciais xa que “grazas a elas vemos como empresas de Vigo triunfan noutros países”.

Pola súa banda, José García Costas encomiou o gran traballo de internacionalización que están a facer as empresas dedicadas ao sector vitivinícola, lembrando que “as exportacións desta denominación representan un 28% da súa produción, unha porcentaxe que se traduciu en 28 millóns de euros en 2014”.

O Auditorio Mar de Vigo está a ser o epicentro deste encontro, que se dividiu en dous días para facilitar a participación de máis adegas. Así as cousas, 19 empresas foron as encargadas de abrir o tempo de catas en reunións de aproximadamente 15-20 minutos. Os compradores van pasando por cada unha das mesas situadas no recinto e anotando as súas impresións con cada proba. As catas levaránse a cabo de 9:00 a 16:00 horas aproximadamente cun receso para un breve xantar. Durante a tarde, os importadores poderán solicitar a visita a algunha das adegas participantes nesta misión comercial.

Hoxe será a quenda das 19 empresas restantes, polo que está previsto que durante os dous días realícense un total de 570 catas. Para facilitar o traballo dos compradores, facilitóuselles un Libro de catas, cos principais datos de cada peme galega e espazo para tomar nota sobre cada viño. Cabe lembrar que se trata de viños da Denominación de Orixe Rías Baixas, procedentes das subzonas de Val do Salnés, Condado do Tea, O Rosal, Soutomaior e Ribeira do Ulla. Segundo os datos que manexa o Consello Regulador da Denominación de Orixe Rías Baixas, das 170 adegas que se integran na mesma, 89 xa están en plans de exportación. Estes viños véndense xa a máis de 60 países, principalmente a Estados Unidos (45,8 %), seguido de Reino Unido (15,4%), Alemaña (10,9%), Holanda (5,8%), Porto Rico (4,5%), México (4,4%), Irlanda (2,5%), Suíza (2,4%), Noruega (2,2%) e Suecia (2%). Ademais, desde o ano 2000, as exportacións dos viños Rías Baixas crecen a unha media anual de máis do dobre que os brancos envasados españois.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información