A Consellería do Medio Rural lembra que só é legal utilizar produtos fitosanitarios en Galicia “que estean rexistrados en España e coa etiqueta en castelán”. Do contrario, expóñense a ser sancionados polo Seprona.
A Xunta responde así aos agricultores que se desprazan a Portugal para mercar produtos fitosanitarios que son máis baratos que en España.
“En España non se permite comercializar nin empregar un producto que non estea rexistrado en España e cunha etiqueta non redactada en castelán, xa que incumpriría as normas de etiquetado”, explica Víctor Novo, xefe do Servizo de Sanidade e Producción Vexetal da Consellería do Medio Rural.
Ademáis lembra que “ao non estar autorizado en España non pode ter o logo de SIGFITO, polo que incumpliría o indicado no R.D. 1416/2001 sobre eliminación de envases”.
O responsable de Sanidade e Produción Vexetal da Xunta advirte tamén de que “non é posible realizar unha comprobación da equivalencia do rexistro de produtos fitosanitarios entre España e Portugal, dado que dita comprobación inclúe coñecer exactamente as composicións de ambos produtos (o de orixe portugués e o autorizado en España), aínda tendo en conta que teña a mesma porcentaxe de sustancia activa na formulación ou que o titular sexa o mesmo en Portugal que en España”.
Por último, Víctor Novo lembra que en España está regulada a importación paralela, recollida no artigo 52 do Regulamento 1107/2009. “As aprobacións para estas importacións paralelas son concedidas por esta Dirección Xeral, e publícanse na web do Ministerio”, subliña. “Outras importacións que non estean recollidas na web non son legais”, conclúe.
Importacións paralelas de produtos fitosanitarios autorizados en España:
http://www.magrama.gob.es/agricultura/pags/fitos/registro/fichas/pdf/Importaciones_Paralelas.pdf
Listado de produtos fitosanitarios autorizados en España:
http://www.magrama.gob.es/es/agricultura/temas/sanidad-vegetal/productos-fitosanitarios/registro/menu.asp