Os apicultores galegos queren capturar 30.000 raíñas de Vespa Velutina esta primavera

A Asociación Galega de Apicultura (AGA) presentou onte en Arzúa o Programa Stop Vespa Velutina, ao que destinará 52.000 euros de fondos propios. Participarán máis de 500 apicultores galegos neste programa pioneiro coordinado por investigadores da Universidade de Vigo.

Publicidade
Os apicultores galegos queren capturar 30.000 raíñas de Vespa Velutina esta primavera

Presentación do programa Stop Velutina de AGA

Máis de 500 apicultores galegos está previsto que participen este ano no primeiro programa de carácter científico, coordinado por investigadores da Universidade de Vigo, para tratar de frear a expansión da Vespa Velutina en Galicia. Trátase do programa Stop Vespa Velutina promovido pola Asociación Galega de Apicultura (AGA) e que este sábado foi presentado en Arzúa coincidindo co Día do Apicultor.

O programa, que está financiado en exclusiva por AGA con 52.000 euros de fondos propios, extenderase ao longo de todo o 2016 en diferentes fases e márcase como obxectivo atopar o método de trampeo e o atrainte máis eficaz e selectivo para capturar exemplares de Vespa Velutina, algo que ata agora non foi testado de forma científica.

O obxectivo que se marcan dende AGA para esta primavera é capturar 30.000 exemplares de raíñas de Vespa Asiática mediante un trampeo masivo con 3.000 trampas e 25.000 doses de atraintes, algo que contribuiría en grande medida a frear a imparable expansión desta praga por Galicia, a onde chegou no ano 2012.

A nivel científico, a encargada de coordinar o programa é Sandra Rojas Nossa, doutora en Bioloxía do Grupo de Ecoloxía Evolutiva e da Conservación do Departamento de Ecoloxía e Bioloxía Animal da Universidade de Vigo.

Ante un auditorio de máis de douscentos apicultores de toda Galicia, Sandra Rojas presentou onte o programa Stop Velutina de AGA, que constará de dúas fases: unha primeira de marzo a xuño e unha segunda do xullo e ata o outono.

“Na primeira fase o obxectivo é capturar raíñas fundadoras en primavera mediante o emprego de 3 tipos diferentes de trampas e outros 3 tipos de atraintes, o que nos da 9 combinacións que testaremos para ver cal é o sistema máis efectivo”, explicou Sandra Rojas.

Sandra Rojas: “Queremos realizar un control integral da praga, algo que non se fixo ata agora”

E é que a baixa eficacia e a pouca selectividade son os principais problemas dos sistemas actuais para capturar vespas asiáticas. Neste sentido, a coordinadora científica do programa informou de que “a partir dos datos que nos proporcionaron apicultores do Val Miñor durante o ano 2015, tanto os sistemas comerciais como os caseiros non atrapaban máis de 6 Velutinas ao día e ademais, son pouco selectivos xa que o 89% dos insectos que atraparon, no caso dos sistemas caseiros, e o 70% no caso dos comerciais, non eran Vespa Velutina”.

Neste sentido, o programa persegue facer un control integral da praga, algo que ata o de agora non se ten feito en Europa, atopando o sistema máis adecuado para atrapar Vespa Velutina en cada fase do seu ciclo de vida.

O obxectivo é capturar unhas 30.000 raíñas fundadoras de Vespa Velutina

“Imos intentar capturar o maior número de raíñas fundadoras posibles, o noso obxectivo é chegar a 30.000 e con isto evitaremos que formen outros tantos niños”, salienta Sandra Rojas.

Para iso realizarase un trampeo masivo entre os meses de marzo e xuño, cando as raíñas fundadoras saen do seu letargo invernal para fundar niños primarios, cun total de 9 combinacións de trampas e líquidos atraintes.

Este material é financiado nun 75% por AGA e distribúese aos apicultores a través das delegacións da asociación nas distintas comarcas de Galicia. O atrainte ten unha vida activa de 15 días ao cabo da cal o apicultor deberá sacar a trampa e facer un reconto dos exemplares de Velutina, cantas delas son raíñas e tamén que outros insectos caen nas trampas. Os datos serán enviados ao Grupo de Ecoloxía Evolutiva e da Conservación do Departamento de Ecoloxía e Bioloxía Animal da Universidade de Vigo e a partir deles poderá realizar un estudo científico sobre cales son os métodos de trampeo e os líquidos atraintes máis eficaces.

O día 4 de xuño celébrase en Arzúa a Mostra Galega de Apicultura e prevese que neste foro xa se podan presentar os primeiros resultados.

Segunda fase: ver cal é o sistema de protección das colmeas máis eficaz

O programa Stop Vespa Velutina de Aga tamén contempla unha segunda fase dende xullo e ata outubro na que se traballará no estudo dos distintos sistemas de protección mecánica das colmeas. E é que nesta época, e sobre todo nos meses de agosto e setembro, é cando se producen a maior parte dos ataques de Vespa Velutina ás colmeas.

O 1 e o 2 de setembro celebraranse en Lugo as Xornadas Internacionais sobre Vespa Velutina

Na presentación do programa Stop Velutina de AGA tamén se informou de que os días 1 e 2 de setembro celebraranse en Lugo as Xornadas Internacionais sobre a Vespa Velutina, organizada polo doutor veterinario Xesús Feás, da Facultade de Ciencias de Lugo. Baixo o título “A avespa asiática: unha especie invasora en Europa: ¿Que nos depara o futuro?”, expertos internacionais debaterán sobre os métodos para controlar a expansión desta praga.

Por último, o secretario xeral de AGA, Xesús Asorey, informou de que o 3 de marzo viaxará a Bruxelas, xunto con outros apicultores do Norte de España para expoñer no Parlamento Europeo a problemática que representa a Vespa Velutina e outros perigos para o futuro da apicultura en Europa.

Xesús Asorey: “A Comisión Europea ten que destinar máis axudas aos apicultores”

“O que imos pedir é que a Comisión de Agricultura ten que incrementar as axudas aos apicultores para poder comprar trampas e atraintes, e que non pase como agora en Galicia, onde no vindeiro Plan Apícola a Xunta si vai incluír axudas para este material, pero coa mesma partida, co cal se detraerá das axudas para a loita contra a varroa ou outras enfermidades”, explicou Xesús Asorey.

Todos aqueles apicultores interesados en participar no Programa Stop Velutina de AGA poden contar con asociación a través da súa páxina web.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información