O vindeiro sábado 20 de febreiro terá lugar o Día do Apicultor en Arzúa, xornada na que a Asociación Galega de Apicultura (AGA) fará a presentación do programa de control da Vespa Velutina, ao que destinará este ano un total de 52.000 euros de recursos propios.
As previsións de AGA é que neste programa poidan colaborar uns 500 apicultores, socios e socias de AGA, das zonas máis afectadas, organizados en 11 delegacións comarcais (DAGAS), que se comprometerán a realizar os traballos de campo propostos no programa de control e cuxos datos serán tratados na Universidade de Vigo como entidade colaboradora, para ter conclusións da súa eficacia.
O programa Stop Velutina de AGA consta de:
1.- Unha captura masiva de raíñas fundadoras, de marzo a xuño, como método preventivo para diminuír a proliferación de niños no verán e outono, para o que porán en funcionamento 3.000 trampas cos seus atraíntes.
2.- Un programa de investigación aplicada, que permitirá diagnosticar os mellores métodos de captura e control da Vespa velutina co menor impacto posible sobre outros polinizadores.
O programa e os seus contidos iranse actualizando e completando a través da web de AGA. Será coordinado a nivel científico pola doutora Sandra Rojas Nossa, bióloga que traballa co Grupo de Ecoloxía Evolutiva e da Conservación do Departamento de Ecoloxía e Bioloxía Animal da Universidade de Vigo, e que tamén é apicultora e socia de AGA.
Cronoloxía de actuacións Stop Velutina:
O día 20 de febreiro, no Día do Apicultor en Arzúa, será presentado o programa e procederase á distribución das trampas cos seus atraíntes.
O día 3 de marzo, realizarase unha xornada no Parlamento Europeo, convocada polo grupo parlamentario GUE/NGL.
O día 4 de xuño, na 31ª Mostra Galega de Apicultura en Arzúa, haberá unha sesión de seguimento do programa e analizaranse os primeiros resultados.
Os días 1 e 2 de setembro celebraranse as Xornadas Internacionais sobre a Vespa velutina, organizada polo doutor veterinario Xesús Feás, da Facultade de Ciencias de Lugo, socio de AGA, coa colaboración dos cursos de verán da Universidade de Santiago.
Programa Día do Apicultor – Xornada Stop Velutina
Ás 10 horas apertura de instalacións
Ás 11 horas. Sesión sobre Vespa velutina
11 h. Presentación Programa Stop Velutina de AGA – Asorey, Sandra Rojas e Xesús Feás
11.45 h. Palestras:
Fondo-trampa Velutina. Por Salvador Martínez – DAGA Rías Baixas
Fondo-trampa Velutina. Por Paco Graña – DAGA Bergantiños
Artiluxio de protección para a colmea. Por Xesús Asorey – AGA
Investigación sobre a Vespa Velutina en Francia. Por Ludovic de Feraudy – Vetopharma.
Apishield, fondo-trampa Velutina. Por Azucena Marques – Hifarmax.
Plan de actuación contra a Vespa Velutina no Morrazo. Por José María Bello – DAGA Morrazo
Preguntas e debate.
Ás 13 horas. Asemblea Xeral de AGA
Ás 16 h. Sesión sobre os tratamentos da varroa.
Thymovar e Hibee. Por Azucena Marques – Hifarmax.
Maqs. Por Ludovic de Feraudy – Vetopharma.
Checkmite. Por Encarna Garrido – Biopyc.
Ás 16.30 Limpeza de residuos da cera. Por Encarna Garrido – Biopyc.
Ás 18 horas. Clausura da xornada