Galego
CaixaBank alcanzou un acordo co Banco Europeo de de Investimentos (BEI) polo que financiará proxectos empresariais do sector agroalimentario por importe de 200 millóns de euros. En virtude deste acordo, CaixaBank recibe do BEI un préstamo de 100 millóns de euros e comprométese a poñer a disposición das empresas agroalimentarias a mesma cantidade, polo que se eleva a 200 millóns o volume total do financiamento.
Esta liña de crédito destinarase a resolver necesidades de financiamento das empresas agroalimentarias, que poden incluír tanto capital circulante como investimentos a máis longo prazo que contribúan ao desenvolvemento tanto do sector primario como da industria agroalimentaria. O préstamo de 100 millóns de euros que concede o BEI ten que ser empregado nun 30% en dar financiamento a proxectos que contribúan á protección do medio ambiente e a eficiencia dos recursos naturais, así como a apoiar as enerxías renovables e a eficiencia enerxética.
Os préstamos están dirixidos tanto a pemes (empresas de ata 250 traballadores) como a traballadores autónomos, que van poder financiar ata o 100% do custo dos seus proxectos de investimento cun límite máximo de 12,5 millóns de euros por operación.
Ademais, dispoñerán de prazos de ata 10 anos coa posibilidade de ata dous anos de carencia para poder facer fronte a tempadas de malas colleitas ou outro tipo de dificultade. Os períodos de amortización adaptaranse ás circunstancias de cada cliente e poderán ser mensuais, trimestrais, semestrais ou anuais. Este préstamo supón a renovación e ampliación do acordo que CaixaBank e o BEI asinaron o ano pasado, que contemplaba a apertura dunha liña de crédito de 50 millóns de euros. O éxito do financiamento, que se esgotou en seis meses, impulsou que este ano o importe total alcance os 200 millóns de euros.
Con esta firma co BEI, CaixaBank reafirma a súa aposta polo sector agroalimentario, clave na economía española e ofrece as mellores condicións de financiamento aos seus clientes.
Agrobank, a aposta de CaixaBank polo sector agroalimentario
CaixaBank canalizará a nova liña de crédito asinada co BEI a través da súa liña de negocio especializada no sector agrario, AgroBank, que conta con máis de 335.000 clientes do sector en todo o territorio español. Ademais, co obxectivo de reforzar o crecemento no sector agrario e incrementar a vinculación cos seus clientes, CaixaBank dispón de oficinas especializadas en todos os núcleos de poboación cuxa actividade económica susténtase en boa medida sobre o sector agrario.
En total, conta con 576 oficinas AgroBank en España -16 en Galicia-, desde as que presta un servizo próximo, especializado e altamente profesional que permite manter e mellorar a nosa posición como entidade de referencia para este sector. Nas oficinas AgroBank, tematizadas con motivos agrarios, os clientes teñen á súa disposición máis de 2.000 profesionais cun alto coñecemento do sector e, en concreto, dos subsectores produtivos destacados na zona.
Desta maneira, dispoñen dunha oferta adaptada ás peculiaridades dos agricultores, gandeiros ou cooperativistas da rexión para ofrecer un servizo financeiro realmente útil e de alto valor para os clientes. Así mesmo, os equipos están dotados con tablets e smartphones, que lles permiten realizar a asesoría financeira e a contratación de produtos desde as propias explotacións agrarias. Outra das características da liña de negocio AgroBank é o fomento da formación e do networking dos profesionais do sector a través da organización de xornadas técnicas AgroBank con relatoras de alto nivel.
A proposta de valor de AgroBank complétase, entre outras, con servizos como publicacións agrarias, accións de colaboración coa Obra Social e a creación dunha categoría especial, no marco dos Premios EmprendedorXXI, para galardoar a aquelas empresas emerxentes con capacidade de xerar riqueza dentro do sector agroalimentario.
