Galego
Valoración coincidente das tres principais organizacións agrarias en valorar como positivas as medidas presentadas esta mañá pola Consellería para inxectar liquidez nas explotacións pero tamén en que non se está a dar solucións urxentes para as explotacións que están a cobrar o leite a 20 e a 18 céntimos o litro.
Isabel Vilalba, secretaria xeral do Sindicato Labrego Galego, insiste en que “o fundamental sería a recuperación do prezo do leite, e aí non houbo avances, como tampouco os houbo na eliminación dos contratos lixo nin na persecución por parte da Administración das poxas de leite por parte da distribución a baixo prezo, incluso a 37 céntimos”.
Respecto, ás dúas ordes para inxectar liquidez anunciadas pola Consellería, Isabel Vilaba, considera que “son medidas positivas, pero moi parciais, porque o problema está no prezo”.
ASAJA-Galicia: “A industria comprometeuse a incorporar aos gandeiros que están en mans de primeiros compradores”
Pola súa parte, Francisco Bello, secretario xeral de ASAJA-Galicia, valorou como “o máis importante que a industria comprometeuse a incorporar nos próximos días aos gandeiros que están en mans de primeiros compradores, que son os que padecen os peores prezos e que deste xeito mellorarían a súa situación”.
Igualmente, Francisco Bello salientou a petición que se lle trasladou ao Ministerio e á Consellería para que “investiguen se é legal a entrada de cisternas e leite envasado procedente de Portugal a prezos anormalmente baixos e que está a distorsionar o mercado”.
Unións Agrarias: “non se solucionan os problemas de fondo”
Máis crítico se amosou o responsable de Gandería de Unións Agrarias, Javier Iglesias, para quen “non houbo nada novidoso”, aínda que si recoñeceu “un cambio de actitude por parte da Administración e dunha parte da industria, que empezan a recoñecer a gravidade da situación”.
Respecto ás medidas da Consellería para inxectar liquidez nas explotacións lácteas, Javier Iglesias considera que “son medidas interesantes, pero que non resolven o problema de fondo das 2.500 explotacións que están a cobrar a entre 18 e 22 céntimos o litro dende o mes de abril e ás que se non se lles busca unha solución urxente están abocadas ao peche”.
Por último, o responsable de Gandería de Unións Agrarias amosou as súas dúbidas do compromiso da industria de recoller o leite ás ganderías que están en mans de primeiros compradores. “É o mesmo compromiso que tiveron coa conselleira no mes de xuño nunha reunión en Lugo de non deixarlle de recoller o leite ás explotacións”, concluíu.
De aquí ao día 18 de agosto, as organizacións agrarias acordaron co secretario de Agricultura do Ministerio enviarlle as súas propostas para solucionar a crise de prezos das explotacións lácteas. Mentres tanto, a Plataforma pola Defensa do Sector Lácteo Galego inicia mañá en Santa Comba unha calendario de mobilizacións polas principais comarcas gandeiras de Galicia en demanda de medidas urxentes e a medio-longo prazo por parte da Administración.
