O fin das cotas chega marcado pola tensión entre gandeiros e industrias

O sector continúa sen negociacións para pactar prezos e volumes de recollida. As organizacións agrarias aseguran que as industrias ameazan con deixar de recoller o leite dos gandeiros que non asinen os novos contratos que lles están presentando

O fin das cotas chega marcado pola tensión entre gandeiros e industrias

O sector encara a nova campaña con incertidume.

O novo periodo sen cota láctea que se abre este mércores 1 de abril colle ó sector cos deberes sen facer. Gandeiros e industrias, lonxe de chegar a acordos estables para o novo periodo, continúan enfrontados e sen que haxa negociación real entre as partes. O último capítulo das disputas, a ameaza dalgunhas industrias de deixarlle de recoller o leite esta semana a gandeiros que non asinen os contratos que lles presentan, segundo advirten as organizacións agrarias.

A recente reforma da normativa sobre contratos lácteos buscaba impulsar unha negociación colectiva entre gandeiros e industrias sobre prezos e volumes de recollida, pero todo semella seguir como sempre. As dúas organizacións de produtores de Galicia, Ulega e Aprolact, que representan a arredor de 3.500 gandeiros ante as empresas transformadoras, recoñecen que non está sendo posible sentarse a negociar. Estes días, ambas organizacións ultiman un proceso de asociación na busca de gañar un peso que aboque ás industrias ó diálogo.

Os contratos que está presentando a industria son a 6 meses e a prezo fixo, segundo as organizacións agrarias

Entramentres, o sector industrial trata de marcar as regras de xogo. A normativa obriga ás industrias a ofrecer contratos por 12 meses, na idea de que eses acordos teñan un prezo variable en función de índices de evolución do mercado. O sector asegura en cambio que os contratos que se lles están presentando ós produtores estes días son por seis meses e a prezo fixo, segundo declaracións do secretario comarcal de Unións Agrarias no Deza, Román Santalla, a Faro de Vigo. “Están ademais ameazando ós gandeiros con deixar de recollerlles o leite esta semana se non asinan o contrato”, criticou Santalla.

As tres organizacións agrarias tradicionais en Galicia, Unións Agrarias, Sindicato Labrego e Xóvenes Agricultores, ofreceron recentemente unha rolda de prensa conxunta na que recomendaban non asinar ningún tipo de contrato estes días, á espera de que se puidesen emprender negociacións coas industrias ó longo de abril. Santalla incidiu tamén nesta cuestión e indicou que os contratos que finalizan en marzo “teñen automáticamente un mes de continuidade”.

Así as cousas, o novo periodo sen cotas chega sen que haxa un acordo estable entre industrias e gandeiros en cuestións como prezos e volumes de recollida, pero con todo, pode non ser o máis grave da situación. Máis que a nova baixada de prezos en abril que queren aplicar as industrias, o sector está estes días preocupado pola falta de garantías de recollida do leite naquelas explotacións ou rutas que poidan non ser do interese da industria.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información