O próximo domingo, 25 de marzo, terá lugar ás 12 da mañá no concello coruñés de Boimorto a V Poxa de Gando Frisón, organizada por Africor Coruña.
Para esta poxa, que se celebra no marco da Feira Magreco, foron preseleccionados 14 animais: 10 primeirizas e 4 xovencas preñadas. Proceden de ganderías dos concellos de Arzúa (Casa de Lola, Casa Xacobo e gandería Castro Fernández SC), Curtis (Sat A Campa), Toques (Granxa Huerdeiro), Santiso (Miguel Salgado Garea) e Boimorto (Sat Ilma).
Todas estas ganderías están cualificadas sanitariamente e os animais contan con análise das principais enfermidades do gando vacún.
Ademais, Xenética Fontao obsequiará a cada comprador con 3 doses seminais de Armónico e outras 3 de Clun, dous dos touros de maior cualificación da empresa pública galega de xenética.
Ao remate da poxa sortearase un animal de raza Frisona entre os compradores e o público asistente.