As voces da crise do prezo do leite

Campo Galego retrata a difícil situación pola que están a atravesar as explotacións lácteas de Galicia a través de entrevistas a gandeiros que participaron na multitudinaria manifestación deste venres en Santiago de Compostela.

As voces da crise do prezo do leite

José Luis Tomé. Gandeiro de O Corgo (Lugo)

José Luis Tomé. Socio dunha SAT de O Corgo (Lugo)

Temos 180 vacas en muxido. Estamos pasando un momento moi delicado de prezos moi baixos, e coa incerteza de que dun día para outro a industria non cho recolla ou cho paguen a 18-20 céntimos para leite ne pó. Se isto segue así nuns meses teríamos que pechar. Neste momento estamos vendendo o leite a Leche Río a 27 céntimos, o último mes. Levo moitos anos no sector, e recordo bastantes crises, pero coma esta ningunha.

Iván, da comarca da Ulloa (A Coruña).

Teño unha explotación familiar con 60 vacas en muxido. Si que está quedando leite sen recoller, e a situación é que se estás en Reny Picot podes ir para Leche Río, sen prezo, e viceversa. O pasado mes vendinllo a Reny Picot e cobreino a 19 céntimos. Non hai posibilidades de cambiar para ningunha industria neste momento.

MANI_LACTEO_01__gandeiro_2_standa

Iván, á dereita, gandeiro da comarca da Ulloa.

Con estes prezos a situación é francamente ruinosa, tendo que estar aportando as reservas de capital, que xa non eran moitas. A isto hai que unir o verán tan seco que non vai permitir facer unha boa colleita de millo, cando xa non a houbo boa de herba.

A intervención de leite pode ser unha medida a curto prazo, pero creo que a medio-longo prazo se debería fixar un prezo de custos medios de referencia por debaixo do cal non se debería comprar o leite.

David, de Palas de Rei (Lugo).

Teño unha explotación familiar con 50 vacas en muxido. Nesta situación non estamos cubrindo os custos de produción, e estamos tirando dos aforros. O tempo tampouco axuda moito. Estamos vendendo o leite a Leche Río, cun prezo final de preto de 30 céntimos o litro.

MANI_LACTEO_01__gandeiro_3_standa

David, gandeiro de Palas de Rei

Non vexo clara a solución a esta crise. A forma de que suba o produto penso que é primeiro facendo presión sobre a cadea de distribución e logo sobre as industrias. Non pode ser que se venda o leite na distribución a prezos que con cubren os custos de produción dos gandeiros, usándoo como produto reclamo e banalizándoo. É algo que lle corresponden ao Goberno, que faga cumprir dunha vez a Lei de Cadea Alimentaria.

José, de Pol (Lugo)

A nosa explotación conta con máis de 200 vacas en muxido. Trátase dunha SAT familiar. Esta situación estanos afectando duramente, porque temos investimentos e non podemos reducir a produción e baixounos moito o prezo do leite. Estamos agora en 27 céntimos o litro, e con menos de 32 non cubrimos os custos de produción. Estamos vendendo a Lactalis, que de momento séguenos recollendo o leite pero a un prezo que se reduciu moito.

Tócanos agora renovar o contrato, pero imaxino que con prezos á baixa.

A solución creo que é sinxela: en España consúmese máis leite do que se produce. No Sur da Península están cobrando o leite a 5-6 céntimos máis e está entrando leite de Francia de peor calidade, porque alí os prezos son máis altos que aquí. Non entendemos que deixen de recoller aquí leite, cando o producimos máis barato que en Francia e de igual ou mellor calidade.

Non podemos baixar a produción porque temos uns investimentos e para cubrilos precisamos desa produción.

Juan, de Chantada (Lugo)

Temos explotacións medianas, de 60-70 vacas. Tanto a industria como a Administración están deixando tirados aos gandeiros. Estou vendendo a Reny Picot a vintepoucos céntimos. Os contratos estanse a incumprir e a situación agrávase para aquelas explotacións que lle venden o leite a intermediarios, que se quedan cunha parte do prezo do leite, cando este xa está baixísimo.

Penso que a solución pasa por quitar moito intermediario do medio e que a administración apoie moito máis ao gandeiro e non tanto á industria e á distribución.

José Vázquez, de Lalín.

Teño unha explotación familiar mediana de 70 vacas en muxido en Santiso (Lalín). A crise prezos estanos afectando moito porque os que temos explotacións feitas de novo, temos uns gastos moi elevados polos préstamos e con estes prezos do leite non cubrimos gastos. Fixemos as obras da instalación hai 4 anos. Neste momento estámosllo vendendo a Larsa, con dous prezos: un a 29 céntimos e outro segundo o prezo da manteiga do mercado, e o mes pasado cobrámolo a 24 céntimos.

“As explotacións novas estamos na peor situación porque temos que pagar os créditos”

Estamos reducindo ao máximo os gastos pero hai un mínimo do que non podes baixar.

image_print

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información