Galego
O grupo de traballo do sector lácteo que se comprometera a constituir recentemente a Consellería de Medio Rural arrancou o seu traballo nunha reunión na que participaron representantes da Administración, das organizacións agrarias e das cooperativas. O obxectivo do grupo céntrase en abordar as incidencias que se están detectando nas últimas semanas no campo en canto a dificultades na recollida do leite e a prezos anormalmente baixos.
A directora xeral de Produción Agropecuaria, Patricia Ulloa, destacou o clima cordial do encontro e a disposición de todos os presentes á busca de solucións ós problemas do sector. Ulloa incidiu tamén en que a Administración autonómica estuda todas as denuncias presentadas e en que está pendente o impulso a órganos de arbitraxe que medien entre produtores e industrias.
