Acto informativo sobre as razas Fleckvieh e Pardo Alpina na feira Cimag – Gandagro

Expertos austriacos e españois exporán no certame as características produtivas destas vacas, que destacan pola súa dobre aptitude, láctea e cárnica, e polos maiores niveis de graxa e proteína no leite

Acto informativo sobre as razas Fleckvieh e Pardo Alpina na feira Cimag – Gandagro

Vacas da raza fleckvieh, nunha anterior edición de Cimag-Gandagro.

A feira Cimag – Gandagro, que se desenvolverá entre o 21 e o 23 de febreiro en Silleda (Pontevedra), contará cunha xornada adicada ás razas Fleckvieh e Pardo Alpina. O acto, orientado ós gandeiros, explicará as características destas razas, que destacan pola súa dobre aptitude, láctea e cárnica, e por mellorar os índices de fertilidade e lonxevidade, en comparación coas frisoas.

O acto informativo contará con expertos e xenetistas, tanto españois coma de Austria, país de orixe da raza Fleckvieh. Está prevista a participación de Peter Kreuzhuber e Alexander Manrique, director e director de vendas de Genetic Austria; dun representante da Federación Bovina de Austria; de Jordi Tost, veterinario especialista da distribuidora de xenética Allfeed; e de Antón Barreira, responsable da empresa Ganados Barreira Bascuas, coorganizadora do acto.

A presentación contará coa presenza in situ de varias xovencas de ambas razas para dar a coñecer as vantaxes que, segundo Antón Barreira, presentan as reses de Fleckvieh e de Pardo Alpina, unha raza tamén coñecida co nome de Brown Swiss. Entre as vantaxes, Barreira destaca a mellora na fertilidade e lonxevidade, así coma a súa dobre aptitude, para carne e leite. Outro aspecto a subliñar é a calidade do leite en canto a graxa e proteínas, o cal supón que se pague máis, e tamén o índice cárnico dos animais, cunha maior ganancia de quilogramos diaria.

A demanda dos animais, que se adaptan ben ás características da Cornixa Cantábrica, está medrando no último ano e medio, segundo explica Antón Barreira, que sinala que en Galicia hai xa nas granxas aproximadamente unhas 2.000 reses destas razas.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información