A presión sindical obriga a Lactalis a subir en Francia o prezo do leite ata 30 céntimos

A industria acepta pagar a produción de agosto a 28 céntimos, fronte ós 25,7 do contrato vixente, e subirá 0,50 céntimos mensuais ata decembro, en que chegará ós 30 céntimos

A presión sindical obriga a Lactalis a subir en Francia o prezo do leite ata 30 céntimos

Os representantes de Lactalis anunciaron o acordo tras a reunión coas organizacións de produtores. / Imaxe: Fnsea.

Lactalis e os gandeiros franceses chegaron esta mañá a un acordo. A industria gala elevará progresivamente o prezo do leite no campo ata chegar ós 30 céntimos en decembro. O pacto chega despois de que o venres pasado a compañía dese por rotas as negociacións cos produtores e anunciase unitelateralmente unha suba de prezos ata 27,2 céntimos, fronte ós 25,7 actuais. As organizacións agrarias non deron por bo ese anuncio e continuaron coas medidas de presión, o que obrigou a Lactalis a retomar hoxe as negociacións.

O acordo entre as partes foi esta vez inmediato. Lactalis aceptou subir o prezo do leite de agosto ata os 28 céntimos e desde este mes ata final de ano incrementará mensualmente 0,50 céntimos litro no pago ás granxas. Esta decisión supón que os produtores cobrarán o leite os últimos 5 meses do ano a unha media de 29 céntimos, en tanto que en decembro estarán en 30 céntimos.

A cesión de Lactalis ás demandas dos gandeiros chega despois de que os produtores bloqueasen o luns da pasada semana unha factoría da industria en Laval, no oeste francés. Desde entón, a escalada de accións contra a industria foi ascendendo e estes días, nas redes sociais francesas, estaba a convertirse en masiva a campaña de boicot contra os produtos de Lactalis, que en España envasa marcas como President, Puleva ou Lauki.

Situación en Galicia
En Galicia, o sector venlle reclamando tamén a Lactalis nas últimas semanas unha mellora das condicións dos seus contratos. As granxas galegas que traballan coa industria están a cobrar na actualidade arredor de 26 céntimos por litro de prezo base e os contratos que lles presentou a industria marcan unha tendencia á baixa para os próximos meses.

Os produtores reclámanlle ademais a Lactalis arredor de 2 millóns de euros que presuntamente lles está retendo ós gandeiros de xeito irregular. As organizacións agrarias aluden a un acordo ó que chegaron en decembro coas cadeas de distribución para incrementar o prezo do leite e que esa suba repercutise de xeito directo sobre o gandeiro. O problema, din, é que, no caso de Lactalis, os cartos quedáronse no eslabón intermedio entre o supermercado e o gandeiro, a industria.

Ante esta situación, Unións Agrarias ten previsto iniciar en breve unha campaña de boicot contra os produtos da marca francesa.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información